Alerta laranja, zazpi metroko olatuak espero baitira

Eusko Jaurlaritzako Segurtasun Sailak alerta laranja aktibatuko du gaur, asteartea, nabigatzeko arriskuagatik eta olatuek kostaldean egin ditzaketen kalteak direla eta. Alerta 04:00etatik 08:00 arte egon da indarrean, eta berriz aktibatuko dute 16:00etatik 20:00etara.

Euskalmet Euskal Meteorologia Agentziak egindako iragarpenaren arabera, depresio sakon bat dago Atlantikoan, Irla Birjinen ipar-mendebaldean, eta hondoko itsasoa eragiten ari da kostaldean.

Donostian 6 eta 7 metro arteko olatuak izan dira goizean. Itsasoak gogor astindu du kostaldea, eta 12 ibilgailutan kalteak eragin ditu.

Marea biziak ere espero dira gaurko: lehen itsasgora 05:40an izan da, eta bigarrena, 18:00ak aldera. Hala, zazpi metroko olatuak izan daitezke ordu tarte horietan.

Itsasoa zertxobait apalduko da asteazkenerako, baina abisu horia ezarri dute nabigatzeko (00:00etatik 12:00etara) eta kostaldean izan daitezkeen kalteak tarteko (05:00-08:00). 4-5 metroko olatuak aurreikusi dituzte, eta eguerditik aurrera hiru metrora jaitsiko dira.

Aholkuak

Itsaso zakarra dagoenetan, honako gomendioak jarraitzeko eskatu die herritarrei Segurtasun Sailak:

-Urpean igeri egiteko asmoa baduzu, utzi bertan behera.

-Ez erabili ontzirik, eta egiaztatu amarratzeak ondo daudela.

-Ez praktikatu ur-kirolik.

-Ez hurbildu olatuek jotzen duten tokietara.

-Ez arriskatu zeure burua argazki ikusgarriak egiteagatik.

-Itsasora jausten bazara, saiatu olatuek jotzen duten lekuetatik urruntzen eta eskatu laguntza.

-Olatuek edo korronteak eramaten bazaitu, saiatu lasaitzen.

-Ez egin igeri ur-lasterraren kontra.