EITB TALDEA
Baskoniaren Kopako garaipenaren ospakizuna, zuzenean, ETB1en, ETB2n eta ETB ON plataforman
EITB MEDIA
Gainera, Radio Vitoriak programazio berezia izango du egun osoan eta kirolakeitb.eus atariak taldearen inguruko informazio eguneratua eskainiko du, baita Andre Maria Zuriaren plazako ekitaldia ere.
Baskonia taldeko kideak, Errege Kopa irabazi ostean
EITBk bat egingo du Baskoniaren Kopako garaipenarekin eta zuzenean eskainiko du astearte arratsaldean Gasteizko Andre Maria zuriaren plazan egingo zaion harrera. Ospakizuna zuzenean jarraitu ahal izango da ETB1en eta ETB ON plataforman 18:45etik aurrera. Jon Balentziaga, Juan de la Vega eta Aitor Sainz kiroletako kazetariek egingo dute kontakizuna. Ordu berean hasiko da ETB2n eta ETB ONen "Euskadi Quédate" saioko lantaldearen saio berezia, plazaren alboan kokatutako set-etik. Gaueko bederatziak arte, Odei Esnaola aurkezleak eta programako erreportariek hirian bizi den giroa jasoko dute eta eguneko protagonistak elkarrizketatuko dituzte. "Biba Zuek!" saioak ere zuzeneko konexioak egingo ditu Gasteizekin, ongietorriaren azken ordua ezagutzeko, Maialen Arzallusen eskutik.
Valentzian jokatu den Errege Kopan arabarrek osatu duten ibilbide zirraragarriaren lekuko izan da Radio Vitoria: hiru norgehiagokak zuzenean eskaini ditu eta "Supercanasta" irratsaio bereziak egin dituzte larunbat eta igande eguerdian. Emanaldi guztiak GUAU plataforman entzungai daude eta asteartean, egun osoz, buru belarri murgilduko dira zazpigarren Koparen garaipenaren ospakizunekin.
Ekitaldiaren berri emango dute, halaber, Euskadi Irratiak eta Radio Euskadik, eta zuzenean eskainiko da kirolakeitb.eus atarian eta appan.