EiTBk zapi gorria jantziko du gaurtik aurrera

Euskal Irrati Telebistak gaur, uztailak 6, hasiko diren San Fermin jaiei arreta berezia eskainiko die. Txupinazoa zuzenean jarraitu ahal izango da EiTB Taldeko hedabideetan, eta astean zehar zuzeneko konexioak eta saio bereziak eskainiko dira. Bestalde, urtero legez, San Fermin pilota eta erremonte torneoak ikusgai izango dira ETBn eta eitb.eus-en.

Sanferminak ETBn eta eitb.eus-en

Txupinazoak emango die hasiera San Fermin jaiei, 12:00etan. ETB1ek eta eitb.eus-ek 11:00etan egingo dute bat Iruñeko udaletxeko plazarekin, ekitaldia zuzenean eskaintzeko. Urtero bezala, Aritz Agirrek eta Ilaski Serranok egingo dute emanaldiaren gaineko kontakizuna; Aitor Perezek, berriz, udaletxeko elkarrizketak egingo ditu, eta Maite Eskarmendik kaleko giroaren berri emango du.

Gainera, ETB1ek eta eitb.eus-ek San Fermin jaiak agurtuko dituen 'Gaixoa Ni' ekitaldia eskainiko dute zuzenean uztailaren 14an, 23:30ean, Maite Eskarmendi eta Aritz Agirreren eskutik.

Horrez gain, Ilaski Serranoren eskutik, 'Sanferminak 2019' saioa izango da ikusgai uztailaren 7an eta 10ean. Saioak eguneko unerik onenak bilduko ditu, eta emanaldi berezi bat eskainiko du ondoren.

'Sanferminak 2019' saio bereziak

San Fermin eguneko saio berezian (21:00etan, ETB1en eta eitb.eus-en), hiriburuko jaiei ez ezik, Lesakakoei ere erreparatuko diete. Ezpata-dantzariek egun handia ospatzeko egiten dituzten dantzak ikusi ahal izango dira, eta, tartean, nola ez, Lesakako sanferminetako ikur bihurtu den Zubigainekoa nola dantzatzen duten ere ikusiko da. Iruñera salto eginez, Foruen plazako euskal folklore jaialdiaren zati bat erakutsiko dute. Sanferminetan han eta hemen egiten diren euskal dantzen erakusleiho izango da saioa.

Uztailaren 10eko saioan, berriz, ordura arte izandako irudi eta une hunkigarri zein dibertigarrienen errepasoa egingo du Ilaski Serranok. Halaber, Foruen plazan izandako euskal folklorearen jaialdiko bigarren zatia ekarriko du.

Orobat, gaur, 'San Fermin Aurreko Kontzertua' eskainiko da, aurten mendeurrena betetzen duen La Pamplonesaren eta Iruñeko Txistularien Bandaren parte hartzearekin. Igandean, berriz, Iruñeko zezen-plazan iragan ekainaren 15ean izandako 'Musika Banden Nazioarteko Topaketa' ikuskizunaz gozatu ahal izango dugu.

San Fermin pilota txapelketak

ETB2k eta eitb.eus-ek zuzenean eskainiko dute igande honetan Labrit pilotalekuan 11:00etatik aurrera Jokin Altunak eta Iñaki Artolak jokatuko duten Lau eta erdiko San Fermin Torneoko finala. Berebat, binakako txapelketa eta erremonteko torneoa ere jarraitu ahal izango ditugu ETBn eta eitb.eus-en. Binakako finala hilaren 14an jokatuko da Labriten, eta erremontekoa hilaren 13an Uharten. Halaber, emakumezkoen txapelketako finala ere ikusi ahalko da hilaren 13an.

Entzierroa zuzenean, EiTBko irratietan

Aurten ere, EiTBko irratiek jarraipen handia egingo diete jaiei Iruñetik bertatik. Besteak beste, txupinazoa zuzenean eskainiko da lau irratietan. Euskadi Irratian, Iñaki Elorza Txapas-en eta Eli Erasoren eskutik izango da, eta Gazteak ere bat egingo du. Radio Euskadin eta Radio Vitorian, Oihane Arangoa eta Mikel Donazar arduratuko dira emankizunaz.

Berebat, egunero, Euskadi Irratiak, goizean goiz, La Pamplonesaren dianak zuzenean emango ditu, eta, ondoren, entzierroak, Iñaki Elorzaren kontakizunarekin. 'Blai' saioan jaiaren azken ordukoa helaraziko du Elorzak. 'Faktoria' irratsaiorako, Leire Martinez arituko da berriemaile, eta 'Mezularia' saiorako, Mikel Yarza.

Radio Euskadin eta Radio Vitorian, orobat, egunero entzierroen kontakizuna eskainiko da Mikel Donazar eta Haritz Pascualekin.

'Boulevard Magazine'n, Radio Euskadin, egunero leiho zabal bat irekiko diote jaiari, Mikel Donazarrekin bat eginez. Horrez gain, 'Graffiti' saioan egunero bat egingo dute Nafarroako hiriburuarekin Aitor Perez eta Aritz Agirrerekin.

Atari berezia eitb.eus-en

eitb.eus atariaren bitartez, egunero, sanferminetako EiTBren irrati eta telebista emanaldiak zuzenean jarraitu ahal izango ditugu, baita gerora ere. Txupinazoak eta 'Gaixoa Ni' emanaldi bereziek ere bere tartea izango dute webean.

Iruñeko jaietako albiste, argazki eta bideo guztiak eskuragai izango ditugu bertan, noiznahi eta nonahi kontsultatzeko prest. Jaien egitaraua oso-osorik izango da eskura, baita egunez eguneko formatuan ere.