Athletic eta Realaren arteko derbia, gaur, zuzenean, EITBn

F Ligako euskal derbia jokatuko dute gaur Athletic Clubek eta Realak San Mamesen, eta EITBk euskal kirolaren hitzordu garrantzitsu honi jarraipen zabala egingo dio.

Partida ETB1en eta eitb.eus-en zuzenean izango da ikusgai, 20:00etatik aurrera. Naxari Altuna arituko da esatari lanetan, Larraitz Lukas eta Amaia Olabarrieta lagun dituela.

Euskadi Irratian, Aritz Gallastegik eta Juanan Larrañagak egingo dute partidaren kontakizuna zuzenean, "Hiru Erregeen Mahaia" saioan. Radio Euskadin, Asier Kareaga kazetariak Luis Fernando Dadie adituaren laguntzaz emango du norgehiagokaren berri.

Euskaraldiari eta emakumeen futbolari bultzada emateko izango den hitzorduari zabalkundea emango dio EITBk, emakumeen kirolaren alde egiten duen apustuaren baitan.