Estreinaldia PRIMERANen
Hemen da "Smoggie Queens", Anjel Alkain, Jon Iraola eta Aitor Gabilondoren bikoizketa artistikoarekin
EITB
Albina Stardust eta Divina Comedia drag queen-en kolaborazio berezia ere badu komedia ingeles honen euskarazko moldaketak. Ostiral honetan aurrestreinaldia egingo da Bilboko Azkuna Zentroan, eta 21:00etatik aurrera izango da ikusgai PRIMERAN plataforman.
"Smoggie Queens: Brotxa & Pelukaren Erreginak", PRIMERAN plataforman
PRIMERAN euskarazko eta euskal streaming plataformak estreinaldi berezia dakar ostiral honetan: "Smoggie Queens: Brotxa & Pelukaren Erreginak". Ingalaterrako Middlesbrough hirian girotuta, LGTBIQ+ lagun talde baten istorioak eta bizipenak kontatzen ditu "Smoggie Queens" komediak. Phil Dunningek idatzia, osagai ugari ditu: drag ikuskizunak, identitate disidenteak, umorea, aukeratutako familiak…
Anjel Alkain, Jon Iraola eta Aitor Gabilondo arduratu dira, besteak beste, euskarazko bikoizketa artistikoaz, Albina Stardust eta Divina Comedia drag queen-en kolaborazio bereziarekin. Kapitulu bakoitzak 30 minutuko iraupena du eta ekainaren 20an, 21:00etan, estreinatuko ditu PRIMERANek lehen bi atalak.
Bi ordu lehenago, aurrestreinaldia egingo da Bilbon, pantaila handian, 3, 2, 1 ZINEGOAK! ekimenaren barruan. Azkuna Zentroko Golem zinema aretoan izango da hitzordua, 19:00etan, eta Anjel Alkain, Jon Iraola, Albina Stardust eta Divina Comedia izango dira bertan, Unai Iparragirre ETBko zuzendariarekin eta Ainoa Santisteban PRIMERANeko arduradunarekin batera. Bertan egoteko gonbidapena hemen lortu daiteke.