“Perspektiba nostalgiko batetik begiratu diogu gure ibilbideari; xumea izanda ere, gure bizitza izan da”

Skabidean taldeko lagunek Hau Errepikaezina Izan Da izeneko diskoa aurkeztu digute "B Aldea"n. Iruindar bandak 17 abestiko diskoa (estudioko bosgarrena) kaleratu berri du.

Imanol Olague eta Antonio Iriarte taldekideek azaldu digutenez, Skabideanen ibilbidea omendu dute disko honetan, nostalgiatik. Oso gazteak diren arren, 12 urte baitaramatzate oholtza gainean.

Euren bizitzetan gauzak asko aldatu diren arren, taldearen barne sentimenduek indartsu jarraitzen dutela diote taldekideek. Eta hortik atera dute diskoari heltzeko grina.

Aurrerapenik eta iragarpenik gabe kaleratu dute lana, bat-batean. Kaleratzeagatik galdetuta, hau erantzun digute: "Gaur egungo industriaren joerak ulertzen ditugu baina ez dugu horretan sartu nahi, ez ditugu horrelako estrategiak erabiltzen".