hautagaitza ofizialak
Plazaratu dituzte hauteskundeetarako hautagaitzak, Arnaldo Otegi gabe
agentziak | erredakzioa
EH Bilduk iragarri du helegitea aurkeztuko duela Batzordearen ebazpenaren aurka, Donostiako Auzitegian. Hurrengoa Konstituzionalean jarriko du, eta horrek irailaren 7rako erabaki beharko du.
Iriarte da gaur egun Gipuzkoako zerrendaburua, Otegiren lekua hartuta. Argazkia: EiTB
Euskal Herriko Agintaritzaren Aldizkariak (EHAA) irailaren 25ean egitekoak diren euskal hauteskundeetarako hautagaitza ofizialak argitaratu ditu gaur, abuztuak 30, Arnaldo Otegi Mondragon hautagaiaren izena EH Bilduren zerrendatik kenduta.
Gipuzkoako Hauteskunde Batzordeak atzo, astelehena, ebatzi zuen aho batez abuztuaren 24an hartutako erabakia, hau da, Otegi ezin dela lehendakarigai izan "hautaezina" delako, Auzitegi Nazionalak epai batean hala adierazi zuela argudiatuta. Horrez gainera, EH Bilduk aipatutako zigor-legediaren printzipioaren urraketaz mintzatu ezin dela esan zuen, Hauteskunde Batzordearen "ezagutza gainditzen" duelako.
Hala, EHAAk plazaratu duenaren arabera, Arnaldo Otegi Gipuzkoako hautagaitzatik kanpo geratu da, eta Maddalen Iriartek hartu du haren lekua, zerrendako bigarrena zelako. Gainera, Pello Urizar EAren idazkari nagusia bigarren postura pasatu da, Rebeka Ubera Aralarreko kidearen aurretik.
Atzetik, hauek daude: Unai Urruzuno, Larraitz Ugarte, Nerea Kortajarena, Maider Otamendi, Oihana Etxebarrieta, Ander Rodriguez, Aitzol Cajaraville, Pedro Iturbe, María Angeles Esnaola, Fernando Vaquerizo, Baleren Bakaikoa, Fetata Brahim, Unai Asurmendi, Marina Bidasoro, Naiara Carvajal, Igor Ortega, Igone Mariezkurrena, Mikel Urdangarin, Jone Muguerza, Xabier Irazusta, Elena Beloki eta Xabier Isasi.
EH Bilduk dagoeneko iragarri du Arnaldo Otegi mantenduko duela lehendakarigai gisa, eta helegitea aurkeztuko duela Gipuzkoako Hauteskunde Batzordearen erabakiaren aurrean, Donostiako Administrazioarekiko Auzien Epaitegian.
Otegiren hautagaitzaren aurka egiten jarraituz gero, Auzitegi Konstituzionalera joko du, eta horrek irailaren 7ko 24:00ak arte izango du ebazteko.