Rajoy: 'Irabazi egin dugu, gobernatzeko eskubidea aldarrikatzen dugu'

Mariano Rajoy Espainiako Gobernuko jarduneko presidenteak azpimarratu du PPk eskuratu duela garaipena hauteskunde orokorretan, eta, horrenbestez, gobernatzeko "eskubidea" aldarrikatu du.

"PPk errespetua merezi du", nabarmendu du Genova kaleko egoitza nagusiaren balkoitik eskainitako hitzaldi batean.

PPren buruaren esanetan, hauteskundeotan "demokratek, askatasunak eta pertsonen eskubideek" irabazi dute.

Agintaria "guztiekin" hitz egiteko prest agertu da, "Espainia eta espainiar guztiak defendatzeko". "Orain espainiarren % 100entzat erabilgarri izatea da helburua, bozkatu gaituztenentzat eta bozkatu ez gaituztenentzat", esan du.

"Sí, se puede" (Bai, ahal dugu) Podemosen aldarria oihukatu dute popularren jarraitzaileek Rajoy balkoian zegoela.

PPko hautagaiak eskerrak eman dizkie militante eta jarraitzaileei une zailenetan ere ondoan egoteagatik, eta alderdiarekin "harro" dagoela esan du.

"Irabazteko fedea izan duzuelako eta haren bila aritu zaretelako irabazi dituzue hauteskundeak", adierazi du.