aldaketa politikoa AEB-n
Etxe Zurian izandako beste bilera
agentziak
Michelle Obamak eta Melania Trumpek tea hartu eta "Etxe Zurian seme-alabak" hezteak ekartzen dituen arazoen inguruan hitz egin zuten. Ondoren, Trumpek esan du Melaniari asko gustatu zaiola Michelle.
Trump eta Obama, Etxe Zurian. Argazkia: EFE
Michelle Obama AEBko lehen andreak Etxe Zuria erakutsi dio Melania Trump AEBko hauteskundeak irabazi dituen hautagaiaren emazteari, bera izango baita presidentearen egoitzaren anfitrioia urtarrilaren 20tik aurrera.
Michelle Obamak bisitaren ibilbidea egin zuen Melania Trumpekin bertatik, eta, besteak beste, Trumanen balkoia, harrera ofizialen aretoa eta bulego obala erakutsi zizkion, Josh Earnest Etxe Zuriko bozeramaileak egunero egiten duen prentsaurrekoan azaldu zuenez.
Tea hartzen zuten bitartean, "Etxe Zurian seme-alabak" hezteak eragiten dituen arazoen inguruan hitz egin zuten, Trump senar-emazteen semeak, Barronek, 10 urte baititu, Obamatarren alaba nagusiak, Maliak, Etxe Zurian sartu zirenean zuen adin bera, eta Sashak baino hiru gutxiago.
"Bere bi alabek Etxe Zurian igaro dituzte formakuntza urteak, eta Trumpek ere seme bat dauka. Haurtzaro xelebrea da, eta, hori dela eta, garai horretan guraso onak izateko nola jokatu izan zuten hizpide", azaldu zuen bozeramaileak.
Melaniari gustatu egin zitzaion Michelle
Donald Trump AEBko hurrengo presidenteak ziurtatu duenez, Melaniari "asko gustatu zitzaion" Michelle Obama lehen dama, bien arteko bileran jakinarazi zionaren arabera.
"Egun zoragarria Washingtonen. Obama (Barack) presidentearekin bildu naiz lehenengoz. Bilera oso ona, kimika. Melaniari asko gustatu zaio Obama anderea!", Trumpek Twitterren duen kontuan zabaldu duenez.
A fantastic day in D.C. Met with President Obama for first time. Really good meeting, great chemistry. Melania liked Mrs. O a lot!
— Donald J. Trump (@realDonaldTrump) 11 de noviembre de 2016