M26
Navarra Sumak 20. eserlekua lortu du, eta Ezkerrak berea mantendu du
eitb.eus
Botoen zenbaketa bukatuta, EH Bilduk eserleku bat galdu du, eta 7rekin geratu da. Nafarroako Parlamentuko hauteskundeetan eskuratutako eserleku bakarra mantentzea lortu du Ezkerrak.
Navarra Suma, igandeko emaitzak ospatzen. Argazkia: EFE.
Nafarroako Parlamentuko hauteskundeetan zenbatzeke zeuden botoek 20. eserlekua eman diote Navarra Sumari. Horrela, botoen % 100 zenbatuta, UPNk, PPk eta Ciudadanosek osatutako koalizioak 20 parlamentari eskuratu ditu.
Botoen % 3 duen eta zenbaketaren zain zegoen Ezkerrak, azkenean, Foru parlamentuan eskuratutako eserleku bakarra mantentzea lortu du.
Txanponaren beste aldean, EH Bilduk eserleku bat galdu du, eta 7 parlamentarirekin geratu da Nafarroako Parlamentuan.
Zenbatzea burututa, beraz, Navarra Suma da indarrik bozkatuena, 20 parlamentarirekin. Ondoren, PSNk 11 eserleku lortu ditu; Geroa Baik, 9; EH Bilduk, 7; Ahal Duguk, 2; eta Ezkerrak, 1.
Javier Esparza Navarra Sumako hautagaiak hogeigarren parlamentaria lortu izana ospatu du Twitterren, eta izandako "konfiantza" eskertu die koalizioari botoa eman diotenei.
Muy satisfecho con los 20 parlamentarios que ha obtenido Navarra Suma en las elecciones del domingo pasado.
— Javier Esparza (@JavierJesparza) 29 de mayo de 2019
Muchas gracias a todos los que nos habéis dado vuestra confianza.