KANPAINAURREA
Esparza: "PSNk ahal duen alkatetza guztiak emango dizkio EH Bilduri, Chivite presidente egitearen truke"
AGENTZIAK | EITB MEDIA
Iruñarako eta Iruñerriko 15 udaletarako dituen hautagaiak aurkeztu ditu gaur UPNk. "Datozen udal hauteskundeetan Iruñerriko udalerrietan bi aukera baino ez dira egongo: UPNko alkatetzak edo EH Bildukoak" ohartarazi du.
Captura de imagen de un vídeo de EITB de la intervención de Esparza hoy en Pamplona.
Javier Esparza UPNko presidenteak argi du PSNk "ahal duen alkatetza guztiak" emango dizkiola EH Bilduri, "Maria Chivite presidente egitearen truke" eta horri aurre egiteko, UPNri botoa emateko eskatu du.
Maiatzaren 28ko udal hauteskundeetarako Iruñerrirako hautatu dituzten alkategaiak aurkeztu ditu gaur alderdi erregionalistak. Zenbait berriak dira eta beste zenbait lehen ere hautagai edo alkate izandakoak:
Galarrerako alkategaia Francisco Jose Fernandez izango da, Orkoiengoa Diego Viñas, Beriaingoa Eva Campos, Argikakoa Gloria Fernandez, Berrioplanokoa Raul Julio Bator, Noain-Elorz haranekoa Sebastian Marc, Atarrabiakoa Javier Lopez Patus, Antsoaingoa Antonio Vergara, Berriozarkoa Usua Olazar, Arangurenekoa Vanesa Martinez, Zizur Nagusikoa Jose Maria Dios, Barañaingoa Maria Lecumberri, Burlatakoa Ana Gongora, Egues Ibarrekoa Xuriñe Peñas eta Iruñekoa Cristina Ibarrola.
Ekitaldi horretan, Esparzak nabarmendu du UPN izango dela maiatzeko hauteskundeetan "udal zerrenda gehien aurkeztuko dituen alderdia". Zerrendak, azpimarratu duenez, "Nafarroako pertsonek osatzen dituzte, ez ditugu beste erkidego batzuetako pertsonekin osatu behar". "Inor ez da etorriko Madrildik edo Espainiako beste leku batzuetatik nafarren arazoak konpontzera", azpimarratu du.
Gainera, ondorengo ideia nabarmendu du: "Datozen udal hauteskundeetan Iruñerriko udalerrietan bi aukera baino ez dira egongo: UPNko alkatetzak edo EH Bildukoak". "Ez da aukera gehiago egongo eta hori da argi izan behar dute herritarrek". Hala, "EH Bildu geldiarazi dezakeen bakarra UPN" dela nabarmendu du, "2019ko hauteskundeetan ere egin genuen eta maiatzean berriz ere lortuko dugu" gaineratu du.