Iruñea
TRWko hainbat langile artatu dituzte, kea arnastu ondoren
Agentziak | Erredakzioa
Behargin batzuk ondoezik jarri dira, kea arnastu baitute makina batek su hartu eta gero, eta artatu egin behar izan dituzte.
Sutea izan zen atzo gauean TRW lantegiko makina batean, Landaben industrialdean, Iruñean, eta behargin batzuk artatu behar izan zituzten, kea arnastu baitzuten.
Lantegirako kontrol-kabinan zegoen langileak ohartarazi zuen SOS Nafarroa, 22:10ean, eta industria-nabe batetik kea irteten ari zela jakinarazi zuen. Hori dela eta, Cordovilla eta Trinitarios parkeko suhiltzaileei deitu zieten, eta anbulantzia bat ere bertaratu zen.
Enpresaren segurtasun-protokoloari jarraituz, langileak lantegitik atera ziren, Nafarroako Gobernuak ohar baten bidez jakitera eman duenez.
Kremailera departamentuko makina bat
Suhiltzaileen arabera, kremailera departamentuko makina batean piztu zen sutea, eta 22:32rako kontrolpean zuten; beraz, garrak ez ziren hedatu. 23:13ra arte, dena den, lantegia aireztatzen aritu ziren.
Suteen kontrako TRWren taldeko hainbat behargin artatu behar izan zituzten, kea arnastu zutelako, eta enpresaren seguruarekin adostuta dituzten osasun-zentroetara bidali zituzten ondoren. Ez zuten inoren laguntzarik behar izan zentro horietara joateko.
Lantegia aireztatu ondoren, langileek eguneroko zereginei ekin zieten berriro.