Aurtengo sanferminetako kartela, prest!

"Mañanas sanfermineras" (sanferminetako goizak) izeneko kartelak iragarriko ditu aurten Iruñeko sanferminak. Zortzi kartel izan dira finalista, eta herritarrek Maximiliano Cosatti artistak egindakoa aukeratu dute garaile, alde dezenterekin, gainera: denera 5.682 pertsonek bozkatu dute, eta % 27,4k egin dute horren alde (1.558 boto).

2013tik Iruñean bizi den argentinarra da Maximiliano Cosatti (Buenos Aires, 1979). Nabarmendu duenez, txikitatik du lotura sanferminekin, uztailaren 7an jaio baitzen.

Iruñeko Udalak ohar batean jakinarazi duenez, hiriburuan erroldatutako bizilagunek apirilaren 11tik 27ra eduki dute euren gustukoenaren alde bozkatzeko. Guztira, 5.682 pertsonek parte hartu dute, iaz baino 396 gutxiago. 2016an, 6.078 lagunek bozkatu zuten, eta azken bederatzi urteetako parte-hartze marka hautsi zen.

Boto gehien jaso duen bigarren kartela "9 dias de taquicardias" ("bederatzi egun takikardiarekin") izenekoa izan da (finalisten artean, bigarrena). 972 boto eskuratu ditu Amaia Arraras de Mariak (Iruñea, 1983) eta Fernando Hernandez Mañuk (Iruñea, 1981) sortutakoak.

Hirugarren bozkatuena Koldo Aiestaranen (Iruñea, 1966) eta Sisku Simonen (Bartzelona, 1982) "Hnos. Aldaz Remiro" deiturikoa izan da: 851 boto jaso ditu.

371 kartel lehiatu dira aurten sanferminetako irudi izateko. Horietatik gehienak (176, % 47,44) Iruñean egindakoak ziren, eta 83, Nafarroako beste herri batzuetan sortutakoak.

"Mañanas sanfermineras", irabazlea

"9 días de taquicardias", bigarrena

"Hnos. Aldaz Remiro", hirugarrena