Santurtzik Serantes mendiko gotorlekuaren dorrea berrituko du

Santurtziko Udalak Serantes mendiko gotorlekuaren dorrea berreskuratzeko eta nabarmentzeko proiektua onartu du. Gotorlekua 1881. urtekoa da, herrian dagoen zaharrena.

Proiektuak 310.000 euroko inbertsioa du, eta eraikina berreskuratzea ekarriko du, sendotu eta eraberrituta; halaber, egitura berri bat egingo dute horren barruan, dorrera iristeko. Dorreak 70 metro karratu inguruko azalera eta 6,5 metrotik gorako altuera ditu.

Aintzane Urkijo Santurtziko alkatearen esanetan, dorrea berreskuratzeko lanak datorren hilean hasiko dira. Zelatari-postu bezala eraiki zen, eta, hasiera batean, bi solairu eta teilatu lau bat zituen. Gaur egun, eraikinak teilatua galdu du eta hainbat horma hondatzen hasi dira. Gainera, harri landu asko falta dira horren hormetan, kendu egin baitituzte.

Dorreak hormen % 80 zutik ditu oraindik, eta, beraz, Santurtziko Udalak ohar baten bidez esan duenez, “galdu dituen atalak berritzeko une erabakigarrian dago osorik berreskuratu ahal izateko”.

Urkijok ezinbestekotzat jo du “orainari gure iraganaren zati hain garrantzitsua izan zena itzultzen saiatzea”, Bizkaiko arkitektura historiko militarraren eredu baliotsuenetarikoa baita.