#BilbaoGabonak
400 jarduera inguru eta Gabonetako merkatua hartuko ditu Bilbok Eguberritan
EiTB.EUS
#BilbaoGabonak proiektua gaur bertan jarriko dute martxan, 20:00etan. Ordu horretan, Bizkaiko hiriburuko kaleak argiztatuko dituzte, eta Gabon giroa nagusituko da hirian.
Olentzero eta Mari Domingi. Argazkia: Bilboko Udala
#BilbaoGabonak proiektu pilotua abiatuko du azaroaren 28an Bilboko Udalak, Gabon festetan ere, Bizkaiko hiriburua bisitarien eta bertako bizilagunen bilgune izan dadin.
Egitasmo horren helburua da, beraz, inguruko herrietako zein atzerriko bisitariak erakartzea, baita merkataritza eta negozioak bultatzea ere. Hartara, leku magiko eta erakargarri bilakatu nahi dute Bilbo Eguberrietan.
#BilbaoGabonak ekimena gaur bertan aurkeztu dute Udaleko ordezkariek, prentsaurreko batean. Bertan azaldu dutenez eta Europako beste hiriburu batzuen ereduari jarraituta, Bilbok Gabonetako proiektua indartu du. Horretarako, 400etik gora jarduera antolatuko dituzte: Gabonetako merkatua, helduentzako zein haurrentzako aisialdirako leku bat, izotz pista ekologikoa eta argiztapen berria, besteak beste.
Hain zuzen ere, Areatzan eta Erripa kaian egingo dituzte jarduera guztiak, Arriaga eta udaletxea batzen dituen bidean.
Argazkia: José Luis Cazallas Ruiz
Balea erraldoi bat
Esan bezala, 20:00etatik aurrera ekingo diote #BilbaoGabonak proiektuari. Ordu horretan, Juan Mari Aburto Bilboko alkateak Gabon festei emango die hasiera, hiri guztia aldi berean argiztatuta.
Hala, udaletxeko balkoitik harmailetaraino, argi jauzia jarriko dute. Gainera, bideo-emankizuna ere eskainiko dute, eta sei metroko altuera eta 12 metroko luzera duen balea erraldoi bat jarriko dute. Horrela, bai balea eta baita Arriagako 14 metroko zuhaitza ere argiz jantziko dira.
Bestalde, baso magiko baten itxura hartuko du Areatzak. Izan ere, bertako 120 zuhaitzak urre-kolorez apainduko dituzte, argiztapen berezi baten bidez.
Gabonetako merkatua
Aurten, estreinakoz, Gabonetako merkatua edukiko du Bilbok. Udalaren helburua da merkataritza eskaintza eta aisialdia sustatzea. Horrekin, halaber, bisitari gehiago erakarri nahi dituzte. Udaletxeko eta Areatzako zubien artean egongo da kokatuta.
Izotz pista eta txirristak
Berritasunen artean, nabarmentzeko modukoa da izotz pista aire zabalera aldatuko dutela. Hau da, Casillako Pabiloitik atera eta Erripa kaian ezarriko dute.
Gabonak auzoetan
Eskaintza kulturalari dagokionez, Bilboko Udalak gaikako programazioak antolatu ditu barruti eta auzoetan. Aukera anitza egongo da, jarduera tradizionalak (Abesbatzen Gabonetako Kontzertuak, esaterako) baina baita umorea, antzerkia eta zirku garaikidea ere; jarduerak euskaraz eta gaztelaniaz eskainiko dira eta adin guztiak hartu dira kontuan.
Animazioa eta musika emanaldiak kalean
Kalean formatu txikiko kontzertuak ere izango dira. Larunbatean, abenduaren 15ean, 12:30etik 14:30era, 42 musikarik kontzertuak emango dituzte hiriko 15 toki desberdinetan; hartara, erosketak eta merkataritza dinamizatuko dituzte.
Bilboko eta Bizkaiko hainbat talde izango dira taula gainean: The Swallows, Radio Cober, Lee Perk, Los Buitres, Gorka Naste, My Bastard Friend, Lee Junior, Confluence, La Mara, High Felicity, Dani Merino, Peri, Baster Band, Jaimones eta Elsa Jazz.
Kultura gehiago
Udal programazio hori beste erakunde pribatu batzuek eta Udalaren beraren beste sozietate batzuek antolatzen dituzten dozenaka jarduerekin osatuko da. Hala nola, Arriaga Antzokiko programazioa, Azkuna Zentroarena edota BilbaoMusikarena.
Olentzero eta Errege Magoak
Gabonetako udal egitarauan lehentasuna dute Errege Magoek eta Olentzerok. Hain zuzen, laster Bilbora egingo duten bisita prestatzen ari dira.
Olentzero izango da heltzen lehena. Baserritik abenduaren 23an (igandea) jaitsiko da, arratsaldez. Ikazkin ezaguna Bilboko kaleetatik ibiliko da 17:30etik aurrera. Carlton Hoteletik Arriaga Antzokiraino joango da kalejiran. Biharamunean, antzoki horretan, 11:00etatik aurrera, hiribilduko ume guztiek bisita egin ahalko diote.
2017ko Errege Magoen desfilea. Argazkia: EFE
Urte berriak Errege Magoen desfilea ekarriko du Bilbora. Urtarrilaren 5ean, kabalkada egingo dute, kolorez, soinuz eta animazioz betetako zalgurdiek lagunduta.
Haurrentzako eta gazteentzako jarduerak
Gabonetara begira, aisialdi programa zabala prestatu du Bilboko Udalak 17 urtetik beherakoentzat. Kirol, musika, robotika, sukaldaritza, moda eta bideo-joko tailerrak dira etxeko txikienei zuzendutako jardueretako batzuk, betiere, gazteak entretenitze eta hezte aldera.
Gabonetan euskaraz
Euskararen erabilera bultatzeko asmoarekin, "B-Tuber-izan, euskal YouTuber" tailerra abiatuko dute, Azkue Fundazioarekin elkarlanean. Parte hartzaileek bideoak euskaraz sortu, editatu eta zabaldu beharko dituzte, Youtube sare soziala erabilita.
57 Gabonetako zuhaitz
Auzo guztiek Gabonetako zuhaitza izango dute. Guztira, 57 zuhaitz jarri dituzte: horietatik 16 artifizialak dira, eta gainerakoak hirian bertan urte osoan zehar dauden zuhaitzak dira.
Argazkia: Orhi Zeberio
Ordutegi aldaketak, ostalaritzan
Ia bi ordu geroago ixteko baimena izango dute ostalaritza lokalek, abenduaren 14tik urtarrilaren 6ra, "eguneko" establezimenduek eta terrazek salbu