Entzierro garbia eta jendetsua izan da larunbat honetakoa

Seigarren entzierroa garbia, azkarra eta jendetsua izan da. Hiru pertsona bakarrik eraman dituzte Nafarroako Ospitalera, sanfermin jaietako larunbat honetan. Euri pixka bat egin du goizaldean, Iruñean.

Fuente Ymbro ganadutegiko zezenek abiadura handian hasi dute lasterketa, eta gazteren bat irauli dute ibilbidearen lehen zatian, Santo Domingoko aldapan zehazki.

Lurra bustita izatearen ondorioz zezenak hainbat aldiz erori dira lasterketa osoan zehar, baina bat bera ere ez da besteengandik urrundu. Lasterketak bi minutu eta berrogei segundo iraun du.

Zezen taldea azkar pasatu da udalbatza plazatik eta Mercaderesetik, bertan hartu da Estafetako kurba. Azken puntu horretan txirrist egin dute batzuek, eta zezenak berriz bildu dira.

Estafetaren erdialdean, gaur lasterkariz beteta zela, tentsio-uneak bizitu dira, zezen batek adarrarekin gazte bati kamisetatik heldu dionean, baina, azkenean, ez du adarkatu.

Zezenak batera heldu dira plazara, seigarrena zertxobait atzeratu den arren. Halere, ez du arriskurik eragin, eta erritmo konstantean joan da.

Ganadutegi honetako zezenak izan ziren 2013ko uztaileko entzierro estuaren protagonistak, plazarako sarbidean hainbat lasterkarik pilatu zirenean.

Zaurituek alta jaso dute

Gaurko entzierroan zauritutako hiru korrikalariek medikuen alta jaso dute. Bien bitartean, aurreko egunetako lasterketetan zauritutako zortzi pertsonak ospitalean jarraitzen dute. Horietatik lauk adarkadak jaso zituzten, baina guztiek onera egin dute.