Juan Mari Aburto, "Faktoria"n

Juan Mari Aburto Bilboko alkatea izango da ostiral honetan "Faktoria"ko gonbidatu nagusia. Hiriaren inguruko kontuez gain, galdetuko diogu ea zer iruditzen zaion epaile batek Basurtuko Bihotzeko Kirurgia zerbitzua Gurutzetara lekualdatzeko prozesua gerarazi izana. Bi zerbitzuak bat egitearen alde ote dago bera? Goizeko 8:30ean hasiko da elkarrizketa.

Bestelakoan, Euskaraldiaren hirugarren edizioa hasiko den egunean, tarte berezia eskainiko diogu aurtengo ekitaldiari, eta arigune berezi batera gerturatuko gara: Iruñeko Izarra tanatoriora. 09:00etatik aurrera, berriz, solasaldiaren garaian, Iñigo Aduriz, Estitxu Garai eta Ibai Fernandez espero ditugu aktualitateak dakartzan puntako gaiak jorratzeko.  

Lekukoa Maider Segurolak hartuko du 10:00etan, magazinari ekiteko. Hasteko, Euskaraldia izango dugu hizpide, txapa janzteko lehen egunean, hainbat adibiderekin. Eskuko hiztegia 10 hizkuntzatan argitaratu dute Bizkaian, eta Mirari Erkiagak emango dizkigun azalpenak. Gainera, auzoko harrera linguistikoaz hitz egingo digu Onintza Olaizolak, Topaguneko aniztasun saileko arduradunak. Donostiako Egian hondurastarren dendan euskarazko kartela jarri dutela ere aipatuko dugu, eta Pantailaldiaz ere arituko gara bertan parte hartu duen Ioritz Gonzalezekin. Jarraian, Aintzane Garmendia, Amezketako Argaia Goenako baserritarra izango dugu "Bai baina" tartean, eta elkarrizketatu nagusia Bianditz Iraola izango dugu, CAFeko euskara zerbitzuko burua, alegia.

11:00etako orduan, Gatibu taldearen lehen diskoa entzungo dugu, eta Haimar Arejita gitarristak Gasteizko Jimmy Jazzen egingo duten disko entzunaldiaz hitz egingo digu. Gainera, neguko elikadura izango dugu hizpide Amaia Diaz De Monasterioguren nutrizionistarekin; Mari Karmen Iradirekin, indabez hitz egingo dugu; eta Leire Morearekin, berriz, mondejuez. Nazioarteaz hitz egingo dugu ondoren Izaro Ieregi artista plastikoarekin, eta Bizkaiko informazio lokalaren tartean, Zornotzako emakumeen bizipenak jasotzeko postalez ariko zaigu Ainhoa Salterain Berdintasun zinegotzia.

BBC tertulian, berriz, barreaz ariko zaizkigu Asel Luzarraga, Aitor Altuna eta Intza Alkain, eta, amaitzeko, barreterapiari buruzko xehetasunak emango dizkigu Manex Beristainek.