'Bago!az' saioko partaideak, ostiralean, 'Faktoria'n

Finala hurreratzen ari den honetan, ETB1eko 'Bago!az' saio ezaguneko partaideak izango ditugu, ostiralean, 'Faktoria'n, Maria Ereño, Iñaki Torralbo eta Iñigo Azpitartea etorriko baitira estudiora. Gainera, Frantziako hauteskundeak izango ditugu hizpide solasaldian, eta Jean Louis Ladouche Azkaineko auzapez ohi eta Fillonen gertukoarekin, Guillaume Darden Melenchonen aldekoarekin eta Beñat Oihenart Fronte Nazionaleko jarraitzailearekin mintzatuko gara. Bestalde, kimioterapia saio batean izan da Tere Beloki, eta bertan jasotakoa entzuteko aukera izango dugu goiz osoan.

Saioa 07:00etan hasiko da, eguneko albiste nagusien errepasoarekin. 08:00etan, Maite Artolak hartuko du 'Albiste Faktoria'ren gidaritza. 08:30ean, solasean arituko dira Felipe Juaristi, Eguzki Urteaga eta Maite Ubiria. Frantziako presidentetzarako hauteskundeetako lehen itzuliaren atarian, inkestak eta aurreikuspenak nola dauden aztertuko dugu, eta solaskideekin batera arituko dira Jean Louis Ladouche Azkaineko auzapez ohia eta Fillonen gertukoa, Guillaume Darden Melenchonen aldekoa eta Beñat Oihenart Fronte Nazionaleko jarraitzailea. 09:30 aldera, kimio saioan izango gara, eta, jarraian, Jon Sarasuaren gogoetaren tartea entzungo dugu. Hizkuntza indigenen batzarra egiten ari dira Bartzelonan, eta bertatik sartuko zaigu.

10:00etan, Ainhara Zuazabeitiak hartuko du lekukoa. Hasteko, argaltzen garenerako gordeta genituen jantziez hitz egingo dugu. Jarraian, Mikel Gartziak eta Jurdan Arretxek asteko titularrak aztertuko dituzte. Kirol aurrerapena egin ondoren, Urdaibai Bird Center zentroarekin bat egingo dugu, Edorta Unamunorekin hitz egiteko.

11:00etan, 'Bago!az' saioko Maria Ereño, Iñaki Torralbo eta Iñigo Azpitartea etorriko zaizkigu. 11:30ean, kimioterapia saioaren tarte berria entzungo dugu.

12:00etan, asteburuan 'Amarauna' saioan izango dituzten eduki nagusien aurrerapena jasoko dugu. Gainera, Ane Muñozen zinemarako proposamena entzungo dugu, eta zinema-aretoetan ikusgai izango diren lanen berri ere jasoko dugu.

07:00etatik 13:00etara arituko da lanean 'Faktoria'.