Ostiralean
Itziar Ituño, Aitor Merino eta Joxean Bengoetxea aktoreak, 'Faktoria'n
G.U. | ERREDAKZIOA
Euskal Herrian eta Madrilen dauden lan aukerez, lan baldintzez eta presioaz ariko gara eurekin. Zorrotzako tren pasabideaz protesta egiteko 'Despacito' bertsioa egin duten anaiak ere izango ditugu
Itziar Ituño, Josean Bengoetxea eta Aitor Merino
Madrilen ari diren hiru euskal aktore batuko ditu 'Faktoria'k, ostiraleko saioan: Itziar Ituño, Aitor Merino eta Joxean Bengoetxea. Euskal Herrian dauden lan aukerez, Madrilen zabaltzen direnez, lan baldintzez eta presioaz hitz egingo dute Maite Artolarekin, solasaldian. Gainera, Zorrotzako tren pasabidea lurperatzeko egitasmoa oso mantso doala salatzeko 'Despacito' kantuaren bertsioa egin duten anaiak ere gonbidatu ditugu: Igor eta Jabi Gutierrez.
Saioa 07:00etan hasiko da, eguneko albiste nagusien errepasoarekin. 08:00etan, Maite Artolak hartuko du 'Albiste Faktoria'ren gidaritza. 08:30 aldera, solasean arituko dira Felipe Juaristi, Edurne Egaña eta Maite Ubiria. 09:15 aldera, Itziar Ituño, Aitor Merino eta Joxean Bengoetxea aktoreekin hitz egingo dugu. 09:45 aldera, Jon Sarasuaren gogoeta entzungo dugu.
10:00etan, Manu Etxezortuk hartuko du lekukoa. Hasteko, Ibilaldiaren aldeko pilota partida jokatuko dute larunbatean Mungian. Jende ezagunak hartuko du parte. Horietako bi, Koikili Lertxundi eta Alex Sardui, izango ditugu. Jarraian, Mikel Gartziak eta Jurdan Arretxek asteko titularrak aztertuko dituzte. Kirol aurrerapena egin ondoren, Urdaibai Bird Center zentroarekin bat egingo dugu, Edorta Unamunorekin hitz egiteko.
11:00etan, Zorrotzako tren pasabidea lurperatzeko egitasmoa oso mantso doala salatzeko "Despacito" kantuaren bertsioa egin duten anaiekin hitz egingo dugu, Igor eta Jabi Gutierrezekin. Ondoren, gas naturala garraiatzen Sestao Knutsen gas ontzian lan egiten duen Iñigo Gabilondo soraluzetarrarekin bere lanbidea ezagutuko dugu. 11:30ean, Garbiñe Agiriano psikologoaren tartea zabalduko dugu. Gainera, Durangoko Apirileko Ferian kuku bat egingo dugu.
12:00etan, Nagore Telleriak asteburuan 'Amarauna' saioan izango dituzten eduki nagusien aurrerapena egingo digu. Gainera, Ane Muñozen zinemarako proposamena entzungo dugu, zinema-aretoetan ikusgai izango diren lanen berri ere jasoko dugu, eta Demode Quarteten azken ikuskizunaren berri ere izango dugu.
07:00etatik 13:00etara arituko da lanean 'Faktoria'.