Maiatzak 16
Euskara erakargarriago egiteko proposamenak, asteartean, 'Faktoria'n
G.U. | ERREDAKZIOA
Jaurlaritzak eta Euskaltzaleen topaguneak hizkuntza inertziak aldatu eta euskararen erabilera sustatzeko martxan jarritako egitasmoa ezagutu, eta Iñaki Eizmendi EBTko kidearekin hitz egingo dugu.
Euskara erakargarriago egiteko proposamenak ezagutuko ditugu, asteartean, 'Faktoria' saioan. Batetik, Eusko Jaurlaritzak eta Euskaltzaleen topaguneak hizkuntza inertziak aldatu eta euskararen erabilera sustatzeko martxan jarritako egitasmoa ezagutuko dugu Estibalitz Alkorta Eusko Jaurlaritzako Euskara Sustatzeko zuzendariak eta Iker Martinez de Lagos Euskaltzaleen Topaguneko ordezkariarekin. Gainera, Iñaki Eizmendirekin, gaztetxoen eta haurren artean euskara sustatzeko EBTko kidearekin hitz egingo dugu.
07:00etan hasiko da saioa eguneko albiste nagusien errepasoarekin. 08:00etan, Maite Artolak hartuko du gidaritza, eta Niko Cuenca ekonomistarekin hitz egingo dugu, hasteko. 08:30ean, solasaldian izango ditugu Laura Mintegi, Mikel Aramendi eta Joseba Arruti. 09:00etako albiste errepasoaren ostean, Xabier Irastorza ELAko ordezkariarekin hitz egingo dugu unibertsitatez kanpoko hezkuntza publikoan biharko deituta dagoen grebaz. 09:30ean ariko gara hizkuntza inertziak aldatu eta euskararen erabilera sustatzeko ekimenaz. Gainera, Eli Larrinagaren sinadura ere jasoko dugu.
10:00etan, Manu Etxezortuk hartuko du lekukoa, 'Faktoria Magazina' abiatzeko. Lehenik eta behin, Nafarroako Goi Mailako Musika Kontserbatorioko Nekane Iturriotz akordeoi katedradunarekin hitz egingo dugu Astor Piazzola tango konposatzaile argentinarra omentzeko Iruñean antolatu duten zikloaz. Jon Sanchezek aktualitatea puri-purian ekarriko digu gero, eta, kirol aurrerapena entzun ondoren, 'Ekosfera' saioaren leihoa zabalduko du Jokin Aldazabalek, Donostian, Lourdes Txikin bota dituzten zuhaitzez hitz egiteko.
11:00etan, euskara erakargarriago egiteaz hitz egingo dugu Iñaki Eizmendirekin. 11:30ean, Carlos Cid eta Xabier Amuriza direnez eta ez direnez arituko dira. Bakardadea izango dute gai nagusi.
12:00etan, 'Sukaldari Dema' izango dugu Pili Manterola eta Igor Zalakain sukaldariekin. Amuarraina prestatuko dute, baina erronka bat izango dute: urdaiazpikorik gabe prestatzea. Saioa amaitu aurretik, Amancay Gaztañagarekin ere hitz egingo dugu.
07:00etatik 13:00etara ariko da lanean 'Faktoria'.