Garbiñe Aranburu, LABeko idazkari nagusi berria, asteazkenean, 'Faktoria'n

40 urte beteta, LAB sindikatuak aro berriari ekin dio joan den astean egindako biltzar nagusiaren ondotik. Kongresuaren goiburuak berak adierazi nahi izan du aro aldaketa hori, etorkizunari ez ezik iraganari ere keinu eginez: "LAB 4.0 Gure Garaia" izan da bederatzigarren biltzarreko goiburua, eta kongresu horretatik idazkari nagusi berria atera da % 91eko babesarekin: Garbiñe Aranburu. Asteazkenean, 09:00etatik aurrera, espero dugu 'Faktoria'n. Bestalde, magazinean, oinutsik bizi nahi dutenekin hitz egingo dugu. Alaitz eta Maiderren "Txanpon baten truke" kantuaren barrenak ezagutuko ditugu.

07:00etan hasiko da saioa, eguneko albiste nagusien errepasoarekin. 08:00etan, Iñigo Alustizak hartuko du gidaritza. Hasteko, Tabakoaren Kontrako Nazioarteko Eguna izango dugu hizpide. 08:30ean hasiko da solasaldia, Eguzki Urteagarekin, Javier Arrietarekin eta Hedoi Etxarterekin. 09:15 aldera, Garbiñe Aranburu etorriko zaigu estudiora.  09:45 aldera, ekonomia tartea zabalduko dugu Mari Jose Arangurenekin.

10:00etan, Ainhara Zuazabeitiak hartuko du lekukoa. Hasteko, izozkiak egiten ikasiko dugu. Kattalin Minerren tartea izango dugu gero, eta, kirol aurrerapenaren ondoren, Juanjo San Miguel lankideak Palestinako OLP alderdiaz hitz egingo digu.

11:00etan, oinutsik bizi nahi dutenekin hitz egingo dugu. Korrika oinutsik egiten dute, eta kalean ere oinutsik ibili nahi dute, libre eta aske. Juanjo Garmendia, Kontxi Garmendia, David Bustamante eta Iker Basterretxea ezagutuko ditugu. 11:30ean, Arantzazu Fernandezekin berriketan arituko gara, selektibitateaz.

12:00etan, Alaitz eta Maiderren "Txanpon baten truke" kantuaren barrenak ezagutuko ditugu. Gainera, BCBLtik kontatuko digute 65 urtetik gorako garunen bila ari direla, hizkuntzaren inguruko ikerketa egiteko. Saioa amaitzeko, Imanol Ituiñoren irrati bidezko magia izango dugu.

07:00etatik 13:00etara izango da martxan 'Faktoria'.

oria'.