Astelehenean
Arabako Errioxako mahats bilketa eta Eneritz Furyak akustikoan, 'Faktoria'n
ERREDAKZIOA | G.U.
Oihane Yustos lankidea Compaños upategiko arduradun eta langileekin egongo da. 'Forum Filatélico' auzia ere izango dugu gogoan. Bestalde, Eneritz Furyak musikaria akustikoan ariko zaigu magazinean.
Aurtengo uzta biltzen hasi dira Arabako Errioxan. Mahats zuria, oraingoz. Lan horretan ari direla hitz egingo du astelehenean Oihane Yustos lankideak Compañon upategiko arduradun eta langileekin. Asteleheneko 'Faktoria'n, Forum Filatelico auzia ere gogoratuko dugu. Iruzur haren erantzuleen aurkako epaiketa egun horretan bertan hasiko baita. Piramide erako inbertsio sare hartan, 10.000 euskaldun nahastu zituzten. Askok eta askok aurrezki guztiak galdu zituzten. Horietako baten testigantza jasoko dugu. Magazinean, bestalde, Eneritz Furyak musikariak etxeetako egongeletan eskaintzen dituen kontzertuez hitz egingo digu, eta emanaldi akustikoa eskainiko digu.
07:00etan hasiko da albistegia, Igotz Alkortaren gidaritzapean. 07:45ean, Maite Artolak hartuko du gidaritza, eta Maialen Arzallusen zutabea entzungo dugu. 08:00etan, Niko Cuencaren ekonomia tartea izango da, eta 08:30ean solasaldian izango dira Ramon Etxezarreta, Julen mendoza eta Jose Ramon Beloki. 09:00etako albiste errepasoaren ondoren, 'Forum Filatélico' auziari egingo diogu tartea. Epaiketa hastear den honetan, iruzur piramide horretako biktima izan zen batekin hitz egingo dugu. 09:30ean joko dugu Arabako Errioxara, mahats bilketa nola doan ezagutzera. Albistegia amaitzeko, Bernardo Atxagaren iritzi tartea entzungo dugu.
10:00etan, Manu Etxezortuk hartuko du magazinaren gidaritza. Hasteko, asteburuko kirol emaitza eta gertakizun guztiak aztertuko dituzte Andoni Urbistondok eta Beñat Zarrabeitiak kirol solasaldian. 10:30ean, Martin Gartziandia Gasteizko sindikoak hainbat zalantza argituko digu. 11:00etako kirol aurrerapenaren ostean, Xabier Alberdi 'Euskaldunak eta itsasoa' hamabosteroko kolaborazioarekin etorriko da, eta Elkano itsasgizonaren bizitzaz jardungo du. 11:30ean, Eneritz Furyak musikariak etxeetako egongeletan eskaintzen dituen kontzertuez hitz egingo digu, eta emanaldi akustikoa eskainiko digu. 12:00etan, Kutxa Ekogunea tartean, Kilometroak 2017 izango dugu hizpide, eta, jarraian, '3txulo jokoan' saioaz ariko gara Amaia Ruiz De Galarreta aurkezlearekin. Saioa amaitzeko, Tania Arriagaren 'Harriadak' entzungo ditugu, eta lehiaketa ere izango dugu.
07:00etatik 13:00etara izango da martxan 'Faktoria'.