Kataluniatik saio bereziak, goiz eta arratsalde, 'Faktoria'n

Kataluniatik egingo dugu, asteartean, 'Faktoria' albistegia. Goizeko ohiko saioaz gain, arratsaldean, Carles Puigdemont presidenteak Parlamentean egin behar duen agerraldiaren berri emateko, Maite Artolak beste albistegi berezi bat gidatuko du

07:00etan hasiko da albistegia, Igotz Alkortaren gidaritzapean. 07:55ean, Maite Artolak hartuko du lekukoa, eta Amatiñoren iritzi tartea entzungo dugu. 08:00etan, Niko Cuencak Katalunia uzteko erabakia hartu duten enpresez ariko zaigu, eta 08:30ean, solasaldirako tartean, Laura Mintegi, Andoni Unzalu eta Martin Aranburu arituko dira aktualitatearen analisia egiten. 09:00etako albiste errepasoaren ondoren, Europaren paperaz ariko da Joxe Ramon Bengoetxea. 09:20ean, 'Emakumeen Egia Aitortu' jardunaldietan izan diren Mari Luz Esteban, Ixone Fernandez eta Maddi Lasaren ahotsak bilduko ditugu, eta, albistegia amaitzeko, Itxaso Mendizule arte komisarioaren begiradari erreparatuko diogu.

10:00etan, Manu Etxezortuk hartuko du gidaritza, magazinari ekiteko. Hasteko, Txinara joan nahi dutenei laguntzeko bloga sortu dun Matxalen Palacio bizkaitarrarekin hitz egingo dugu. Jarraian, Maysharen tartea izango dugu. 10:30 aldera, 'Ekosfera' tartea zabalduko dugu Jokin Aldazabalekin Nafarroako ganaderitza estentsiboaz hitz egiteko.

11:00etako kirol aurrerapenaren ondoren, direnez eta ez direnez ariko dira Xabier Amuriza, Karlos Zid eta Nerea Ibarzabal. 12:00etan, 'Sukaldari Dema'  izango dugu, eta Ainhoa Etxebarria aurkezle eta antzezlearen hozkailuan dagoenarekin prestatu beharko dute otordua Pili Manterolak eta Igor Zalakainek. 12:30ean, berriz, musika eta bizitza uztartuko dizkigu Agus Barandiaran musikariak.

Arratsaldeko albistegia, berriz, 17:45etik aurrera gidatuko du Maite Artolak, 19:00ak bitartean. Iñaki Galdos, Jexux Egiguren, Mikel Aramendi eta Javier Diaz Noci izango ditu solaskide, besteak beste.