Ainhoa Etxaideri hurbileko elkarrizketa, 'Faktoria'n

Ainhoa Etxaidek LABeko idazkari nagusi kargua utzi zuela pasatu dira lau hilabete. Ardura publikoak eta haiek dakarten zama utzita, ardura pertsonaletarako denbora hartuta bizi da orain, eta begirada berri horretatik egingo dio elkarrizketa 'Faktoria' albistegian Maite Artolak ostiralean, goizeko 09:30ean hasita. Horren aurretik, aktualitateari buruzko analisia egingo dugu. Javier Arrieta, Hedoi Etxarte eta Maite Ubiriak osatutako solasaldira Maria Solana Nafarroako Gobernuko bozeramailea ere batuko da. Laukoak hartutako azken erabakiak eta berak zuzentzen duen hezkuntza sailari dagozkionei buruzko galderak erantzungo ditu. Bestalde, magazinean EHUren Zientzia Astera joko dugu, Donostiako Tabakalerara.

07:00etan hasiko da albistegia, Iñigo Alustizak gidatuta. Eguneko berri nagusien errepasoa egin ondoren, 07:50 aldera, Maite Artolak hartuko du lekukoa. Ordua ixteko, Fabian Laespadaren iritzi tartea entzungo dugu. 08:30ean, solasaldian izango ditugu Javier Arrieta, Maite Ubiria eta Hedoi Etxarte. 09:00etako albiste errepasoaren ostean, Maria Solanarekin hitz egingo dugu, eta 09:30 aldera, Ainhoa Etxaideren bisita jasoko dugu. Ostiraleko saioa Iban Zalduak itxiko du, musikaz, astearen errepasoa eginez.

10:00etan hartuko du lekukoa Manu Etxezortuk. Magazinaren hasieran, astearen prentsa errepasoa egingo digute Jurdan Arretxek eta Mikel Garciak. 10:30 aldera, EHUren Zientzia Astera joko dugu Donostiako Tabakalerara. Itziar Zubia koordinatzailea, ikerlari  bat eta ikasleak bilduko ditu Ane Albisu lankideak. 11:00etako kirol aurrerapenaren ondoren, Zaldibian IZAN KANTUZ ekimenaren berri emango dugu. 26 orduz etenik gabe euskaraz kantuan. Lau lagun etorriko zaizkigu eta zuzenean kantatuko digute. 11:30 aldera, Ane Muñozen bizitza pasadizoak entzungo ditugu, eta, horren ostean, Kopla Txapelketako asteko onena aukeratuko dugu.

12:00etan, asteburuan 'Amarauna' saioan landuko dituzten gaiak aurreratuko dizkigu Nagore Telleriak. Ondoren, Urdaibai Bird Centerrera joko dugu Edorta Unamunorekin, eta zinema-aretoetan ikusgai izango diren lanen berri ere emango dugu.

07:00etatik 13:00etara, martxan izango da 'Faktoria'.