Asteazkenean
Xabier Perurena aktorea, 'Faktoria'n
ERREDAKZIOA | G.U.
Elkarrizketa pertsonala egingo diogu, 'ANDeROID' webserie berriaren estreinaldia dela eta. Gainera, Kuala Lumpurren bizi den Irene Lasa ere ezagutuko dugu.
Xabier Perurena
Xabier Perurena aktore leitzarrak webserie berria estreinatuko du ostiralean: 'ANDeROID'. Estreinaldiaren harira, bisitan izango dugu 'Faktoria'n, eta elkarrizketa pertsonala egingo diogu. Bestalde, Irene Lasa ezagutuko dugu. Kuala Lumpurren bizi da eta irakasle dabil hango umeei eskolak ematen.
07:00etan hasiko da albistegia, Igotz Alkortak gidatuta. 07:50 aldera, Iñigo Alustizak hartuko du lekukoa, eta Eli Larrinagaren iritzi-tartea entzungo dugu. 08:30ean, solasaldian izango dira Mikel Aramendi, Xabier Riezu eta Amaia Espinosa. 09:30 aldera, berriz, ekonomia-tartea zabalduko dugu. Adrian Zelaia eta Lander Beloki adituekin batera, Amalur Angiozar izango dugu, Gipuzkoako Bazkundeko eus-COMMERCE programako arduraduna.
10:00etan, Manu Etxezortuk hartuko du lekukoa, magazina abiatzeko. Hasteko, gorputzaren beroaldiez egingo dugu solas Idoia Torregarairekin. Entzuleei galdetuko diegu zein musika duten nahiago momentu intimoetarako. 10:30ean, Bergarako San Joxepe jubilatuen etxeko Iñaki Alberdik eta Pili Arinek kontatuko digute nola konpontzen dituzten hondatutako etxeko tresnak Kafe Konpon egitasmoan. Jadanik bost urte daramatzate etxeko traste zaharrak konpontzen.
11:00etako kirol aurrerapenaren ostean, Irene Lasa ezagutuko dugu. Kuala Lumpurren bizi da eta irakasle dabil hango umeei eskolak ematen. 11:30ean, Esther Moyuaren liburu gomendioak entzungo ditugu.
12:00etan egingo diogu elkarrizketa Xabier Perurena aktoreari, eta, 12:30ean, Imanol Ituiñoren magia tartea entzungo dugu.
07:00etatik 13:00etara izango da martxan 'Faktoria'.