Asteazkenean
Idoia Mendia, 'Faktoria'n
ERREDAKZIOA | G.U.
Euskadiko Alderdi Sozialistako idazkari nagusia izango da gonbidatu nagusia. Bestalde, Joxerra Etxebarriarekin solas egingo dugu, UEUk egingo dion omenaldiaren bezperan.
Idoia Mendia Euskadiko Alderdi Sozialistako idazkari nagusia izango da asteazken honetako 'Faktoria'ko gonbidatu nagusia. 09:00etatik aurrera erantzungo die Maite Artolak egingo dizkion galderei. Besteak beste, Pedro Sanchezen agintaldi berriaz eta gobernuburuak hartu eta iragarri dituen politikez, Eusko Jaurlaritzan sozialistek jeltzaleekin duten akordioaz eta harremanaz, eta Legebiltzarrean estatutu berriaz lantzen ari diren oinarriei buruz arituko dira. Bestalde, Joxerra Etxebarriarekin solas egingo dugu, UEUk egingo dion omenaldiaren bezperan.
07:00etan hasiko da albistegia, Iñigo Alustiza gidari. 07:50 aldera, Maite Artolak hartuko du lekukoa, eta Eli Larrinagaren iritzi-tartea entzungo dugu. 08:00etan, Errefuxiatuen Mundu Eguna izanik, ACNUReko Amaia Celorriorekin hitz egingo dugu. 08:30ean, solasaldian izango dira Mikel Aramendi, Javier Díaz Noci eta Amaia Espinosa. 09:15ean elkarrizketatuko dugu Idoia Mendia, eta 09:30ean, asteazkenero bezala, ekonomiaz aritzeko tarte bat ere hartuko dugu. Aste honetan, Mikel Navarroren laguntzaz. Gainera, Forbes aldizkariak munduko ideiarik onenak izan dituzten enpresa izendatu dituen Pukas eta Lufeko ordezkariekin ere mintzatuko dira. Koldo Almandoz zuzendariaren aktualitatearen irakurketa zinematografikoak itxiko du saioa.
10:00etan, Manu Etxezortuk hartuko du lekukoa, magazina abiatzeko. Hasteko, Idoia Torregarairen umore printza jasoko dugu, barruko arropaz aritzeko. 10:30ean, 'Harry Potter'en istorioetako quidditch kirolean aritzen diren Aitziber Mindegia (Euskadi Quidditch Elkarteko ordezkaria) eta Gasteiz Gamusins taldeko Maialen Azkona jokalaria izango ditugu gurean.
11:00etako kirol aurrerapenaren ostean, laser mozketarekin egindako mokaduak dastatuko ditugu Luken Vigo Etxebarriarekin (Iruñeko Baserriberri jatetxeko B+G arduraduna). 11:30ean, berriz, Esther Moyuaren liburu gomendioa entzungo dugu.
12:00etan, elkarrizketa pertsonala egingo diogu Joxerra Etxebarriari, eta, 12:30ean, Imanol Ituiñoren magia tartea entzungo dugu.
07:00etatik 13:00etara izango da martxan 'Faktoria'.