Arnaldo Otegi, astelehenean, 'Faktoria'n

EH Bilduren Kongresu eratzailea amaitu berritan, Arnaldo Otegi koordinatzaile nagusia elkarrizketatuko dugu asteleheneko 'Faktoria'n, 09:00etan. Gainera, ETAk Hipercorreko atentatua egin zueneko 30. urteurrena ekarriko dugu gogora, eta orduko lehendakari Jose Antonio Ardanza eta Roberto Manrique leherketa hartako biktimaren gogoetak bilduko ditugu. Bestalde, Aritz Iriondo, erasoa jasan duen 18 urteko arbitro gaztea, ere gurean izango da.

07:00etan hasiko da saioa eguneko albiste nagusien errepasoarekin. 08:00etan, Maite Artolak hartuko du 'Albiste Faktoria'ren gidaritza. Hasteko, Hipercorreko atentatuaren 30. urteurrenean, Jose Antonio Ardanza orduko lehendakariarekin hitz egingo dugu. 08:30ean, Frantziako Asanblea Nazionalerako hauteskundeen bigarren itzuliko emaitzak ere aztertuko ditu Maite Artolak Eguzki Urteaga, Martin Garitano, Jesus Prieto eta Iñaki Galdos solaskideekin batera. 09:00etako albiste errepasoaren ondoren, 09:15 aldera, Arnaldo Otegirekin hitz egingo dugu. Jarraian, Roberto Manrique Hipercorreko biktima izango dugu. Saioa amaitu aurretik, Bernardo Atxagaren tartea izango dugu.

10:00etan, 'Faktoria Magazina' jarriko du martxan Manu Etxezortuk. Hasteko, ikerketa interesgarri baten berri emango digute Noaingo Ikan Biotech enpresatik. Minbiziaren kontrako ikerketak ari dira egiten zebra arrainekin. Mikel Queraltek azalduko digu zehatzago zertan datzan. Jarraian, Maysharen tartea izango dugu. Kirol aurrerapenaren ostean, Martin Gartziandia Gasteizko sindikoarekin ariko gara solasean.

11:00etako ordua kirol solasaldiarekin hasiko dugu. Beñat Zarrabeitiak eta Andoni Urbistondok asteburuko kirol emaitzak eta gertakariak aztertuko dituzte. Gainera, eurekin izango dute Aritz iriondo, erasoa jasan duen 18 urteko futbol epailea. Gainera, pilotariengana partida bukatu orduko eskumuturrekoak eskatzera joateko ohitura galarazi dutela eta, Eneko Sagastumerekin hitz egingo dugu. Berak askotan eskatu izan die eskumuturrekoa pilotariei. 11:30 aldera, Autzaganeko tunelak ikusteko aukera izango dugu. Janire Gerenabarrena lankidea joango da bertara eta Mikel Iriondo Interbiak enpresako zuzendaria izango du alboan.

12:00etan, Kutxa Ekogunearen tartea zabalduko dugu Maialen Sistiagarekin, udalekuez hitz egiteko. Ondoren, Facebook epaitegira eraman duen Antton Monforte enpresari donostiarra ere Faktorian izango da. Mon Horxata enpresa valentziarreko zuzendaria da bera, eta Facebookeko domeinua itxiarazi zioten, on line bidezko salmentetan galera handia eraginez. Saioa amaitu aurretik, jakina, Tania Arriagaren tartea izango dugu.

07:00etatik 13:00etara, martxan izango dugu 'Faktoria'.

oria'.