Arkumea bi modutan: saltsan eta Villaroy erara

Arkume hanka saltsan:

Lehenengo harakinari esango diogu hankak biltzen joateko aurrez, egun batetik bestera ez direlako lortzen.

Hankak egosi egingo ditugu: urez estali, tipula eta porruarekin, eta pipermin apur batekin, nahi badugu. Irakin arte eduki ostean lapiko azkarrean 40 minutuan erregosiko dugu. Ez bota kokzioko ur hori, gero saltsarako erabiliko dugu eta.

Hanka saldatik ateratzean, erditik ireki eta hezur handia kendu egin diezaiokegu, nahi izanez gero. Haragia samur-samurra egongo da eta erraz kenduko dugu hezurra. Baina hezur txikiak utzi egingo ditugu. Ondoren irin eta arrautzeztatu eta frijitu. Alde batera utzi.

Saltsa egiteko, tipula eta azenarioa txiki-txiki egingo ditugu. Oliotan erregosi eta ardo zuria ere botako diogu. Bukaeran, arkumea egosteko erabili dugun salda gehitu. Ondoren, frijituta ditugun hankak sartu saltsan eta azken berotu bat eman guztiari.

Arkume txuletatxoak Villaroy erara:

Fin-fin ebakiak nahi ditugu txuletak. Gatzatu eta piperhauts beltza egin. Lehenengo plantxan gorritu, alde batetik eta bestetik, kolore pixkat emateko, besterik ez.

Gero, bexamel garbi bat egingo dugu, gehienez tipula pixkatekin goxatua: irina eta gurinarekin egin roux-a eta gero, esnea botatzen diogunean, kroketak egiteko moduko bexamelaren konsistentzia emango diogu. Txuletak bexamelean murgildu eta hozten utziko ditugu. Behin hoztuta, irinetan eta arrautzetan pasa. Ogi birrindutan, ondoren. Gero frijitu eta gozatu!