Alokairuen merkatuaz, 'Faktoria'n

Alokairuen merkatuaz ariko gara astearte honetako 'Faktoria' albistegian. Igor Etxabe Alokabideko zuzendariarekin hitz egingo dugu, Aitziber Etxezarreta EHUko Ekonomia irakasle eta etxebizitza gaien ikerlariaren hitza jasoko dugu, baita beste zenbait iritzi ere. Bestalde, Zinemaldiari ere tarte zabala eskainiko diogu, Koldo Almandozen 'Oreina' filma estreinatuko duten egunean.

07:00etan ekingo dio albistegiari Iñigo Alustizak. 07:45 aldera, Maite Artolak hartuko du lekukoa, eta Amatiñoren 'Sinadura' entzungo dugu. Niko Cuenca ekonomistaren tartearen ondoren, Zinemaldiari zabalduko diogu leihoa Euskal Zinemaren Egunean.

Astearteko solasaldian, Javier Arrieta, Ainhoa Etxaide eta Iñigo Aduriz ariko dira aktualitatearen analisia egiten, eta Begoña Del Tesok Zinemaldiak eskainiko digunaz hitz egingo digu gero.

09:15 aldera, alokairuen gaiari helduko diogu, eta, albistegia amaitzeko, Koldo Almandozekin hitz egingo dugu, Oreina filma estreinatu aurretik.

10:00etako albisteen ostean ekingo dio Manu Etxezortuk magazinari. Hasteko, osasunak zenbat buruhauste dakartzan aztertuko dugu Josebe Blancorekin eta Uxune Martinezekin. 10:30ean, Sofiatik Lisboara bakearen alde egiten ari diren ibilaldiak Euskal Herrian egingo duen bideaz ariko gara, eta, 11:00etan, Oreina-ren estreinaldia dela eta, Ramon Agirre aktorearekin hitz egingo dugu, Kursaalen Euskadi Irratiak duen setetik.

11:30ean, Gorbeian 60 urtez artzain ibilitako Enrike Etxebarria izango dugu, eta, ondoren, txia haziekin ariko zaizkigu sukaldean Pili Manterola eta Igor Zalakain 'Sukaldari Dema'n. 12:30ean, berriz, zementuzko diseinuak ekarriko dizkigu Kattalin Usozek.

07:00etatik 13:00etara izango da martxan 'Faktoria'.