Negoziazio bidean den emakume futbolarien lehen hitzarmenaz, 'Faktoria'n

Sandra Ramajo, Realeko jokalaria eta Ainhoa Tirapu, Athletikeko jokalaria eta AFE, Estatuko futbolarien sindikatuko emakumeen batzordeko presidenteordea, 'Faktoria'n izango dira. Aintzindaria izango da, negoziatzen ari diren akordioa, lehenengo aldiz, lehen mailako emakume futbolariek euren lan hitzarmena izango dute. Europan ez dago halakorik eta lan hitzarmen horretan jaso nahi dituztenak aurreratu dizkigute bi futbolari profesionalek.

Jasone Aretxabaleta, Laura Mintegi eta Iker Rioja solaskideekin, aktualitateak utzitakoak landuko ditugu eta gertutik jarraituko dugu, asteburuan Altsasun izango diren ekitaldiak. Ciudadanos alderdiak Espainiaren batasuna eta Guardia Zibilaren aldeko ekitaldia egingo du Altsasun eta herritarrek euren deialdi propioa egin dute.

Egunari ''Sinadura'' Eli Larrinagak jarriko dio 08:00ak aurretik.

10:00etako albisteen ostean ekingo dio Manu Etxezortuk magazinari. Hasteko, Iker Markinez sukaldariak odolkia, mondejua eta buzkantza bereizten irakatsiko digu. 10:30ean, 12 urterekin kickboxing egiten duen Izaro Blanco Pikaza ezagutuko dugu, eta, segidan, Mutrikuko pinudiak ez fumigatzeko egindako eskaeraren berri emango digu Iñigo Agirrek.

11:00etako albistegiaren ondoren, 'Arts & Science' tartea zabalduko dugu Eneko Axpe, 'Maisha'rekin. Ondoren, Behobia-Donostia lasterketaren atarian, biriketako minbizia izan duen Koldo Goenaga etorriko da bere gaixotasunaz eta lasterketan izango duen parte-hartzeaz hitz egitera. Berarekin batera, Jon Zabaleta medikua izango dugu.

Domu Santu egunaren atariko, hilerri batera joko dugu 12:00etan, eta, horren ondoren, Esther Moyuaren liburu gomendioa entzungo dugu. 12:15ean, solasaldia egingo dugu lehengo eta oraingo heavyzale banarekin. Anestesia taldeko Mikel Kazalisek eta Hilotz taldeko Mikel Yarzak heavy musikarekin izandako esperientziak kontatuko dizkigute.

07:00etatik 13:00etara izango da martxan 'Faktoria'.