Jordi Sanchez, Cridako presidente aukeratu berriari elkarrizketa, Faktorian

Auzitegi Gorenean epaitua izateko Madrilera eraman baino egun batzuk lehenago erantzun ditu Jordi Sanchezek Euskadi Irratiaren galderak. Lledonersko espetxetik erantzun ditu, idatziz, Soto del Realera laster eramango dutela jakitun. Fiskaltzak, sedizio eta matxinada delituak leporatuta 17 urteko espetxe zigorra eskatzen du Sanchezentzat.

Elkarrizketan hastear den epaiketari buruz eta leporatzen zaizkion delituei buruz hitz egin du Sanchezek, bere errugabetasuna defendatuz. Bere defentsa eskubideaz eta epaimahaiaren inpartzialtasun mailari buruz ere aritu da. Sanchezek argitu du, bestalde, bere defentsak zein helbururekin deitu duen lekuko gisa deklaratzera Iñigo Urkullu Lehendakaria.

Epaiketaz gain, Cridako presidente berriak argi aipatu ditu elkarrizketan Kataluniako auzi politikoa konpontzeko ezinbesteko jotzen dituen urrats minimoak. Alderdi independentistek bere ustez egin dituzten akatsei buruz era aritu da Sanchez.

Astelehen goizeko 08:00etatik aurrera eskainiko du Euskadi Irratiko Faktoriak, Jordi Sanchezekin egindako elkarrizketa.

Gainera, Denis Itxaso, Gipuzkoako Turismo, Kultura eta Kirol diputatua etorriko da gurera. FITUR azoka amaitu berritan etorriko zaigu diputatua, bera Madrilgo azokan parte hartu du lurraldearen eskaintza aurkezteko. Turismo sektorearen etorkizuna eta kultura eta kirol esparruetan legealdia amaitu aurretik indarrean jarri nahiko lituzkeen ekimenei buruz galdetuko diogu.

Saioa amaitzeko, ile-inplante turismoari eskainiko diogu tarteka. Gure inguruan nabarmena da gora egiten ari den fenomenoa dela eta ebakuntza hori egiten dutenek Turkiara jotzen dutela. Zenbaki finkorik ez dago baina, Estatu mailako kalkuloek diote 10.000 lagun joaten direla urtero Turkiara, buruko ile-inplateak egitera. Euskal Herritar askok egin duten aukeraketa da eta hori kontuan hartuta, Turkiako klinika batzu hasi dira kontrako bidea egiten: Euskal Herrira etorri eta hemen inplantea egiteko interesa dutenei bisita egiten. Asteburu honetan izango da bisita horietako bat eta han izango gara.

10:00etan ekingo dio magazinari Manu Etxezortuk. Hasteko, Txirikorda proiektua ezagutuko dugu: belaunaldi ezberdineko jendearentzat etxebizitza komunitarioa. Hiritik At kooperatibak bultzatu du Usurbilgo proiektu hau eta Karlos Renedok azalduko digu zein filosofia eta zein helburu dauden proiektu honetan. Bestalde, haur eta gaztetxo transexualen senideek Chrysallis utzi eta sortu duten elkarte berria ezauguko dugu. Bea Sever eta Unai Larrea etorriko dira. Gainera, Ituren eta Zubietako inauterien txanda iritsi da eta bertara hurbilduko gara

07:00etatik 13:00etara izango da martxan 'Faktoria'.