Gipuzkoako eta Donostiako hauteskunde eztabaida, osteguneko 'Faktoria'n

Igandeko udal, foru eta Europako Parlamenturako hauteskundeen atarian, Donostiako Udalerako eta Gipuzkoako Batzar Nagusietarako hautagaiak bilduko ditugu 'Faktoria'n mahaiaren bueltan. Honako hautagaiek parte hartuko dute: Eusko Alderdi Jeltzalearen aldetik, Eider Mendoza Batzar Nagusietarako hautagaiak; EH Bilduren izenean, Reyes Carrere Donostiako alkategaiak; Euskadiko Alderdi Sozialistaren ordezkari gisa Jose Ignacio Asensio Batzar Nagusietarako hautagaiak; Elkarrekin Podemosen aldetik, Aitzole Araneta Donostiako alkategaiak; eta, PPren izenean, Mikel Lezama Donostiako Udalerako hautagaiak.

Aurretik, solasaldian, Nerea Azurmendik, Martxelo Otamendik eta Xabier Riezuk gaurkotasunari lotutako gaiak jorratuko dituzte. Eguneko zutabea Aingeru Epaltzak sinatuko du, 08:00etako albistegiaren aurretik.

10:00etan ekingo dio magazinari Manu Etxezortuk. Hasteko, Eder Aurre moda diseinatzaileari zorte ona opako diogu, Austriara baitoa bihar, ‘Assembly’ Nazioarteko Lehiaketan aukeratu dutelako bere 'Sokotra' bilduma. Gainera, Iker Fernandez de Agirre sukaldariari ere bere asmoen berri galdetuko diogu. ‘Tabegozo’ food-truckarekin ibili ondoren, Japoniara doa gauza berriak probatzera. Bestalde, merosina defizita gaitzaz kontzientziatzeko Hondarribitik Muskizera igerian joango dira bihar abiatuta eta zati bat egingo duen Eneko Perez de Nanclaresekin dugu hitzordua. Dr. Maha´s Miracle Tonic musika taldearen musika entzuteko aukera ere izango dugu, Nerea Alberdi taldekideari elkarrizketa eginez. Azkenik, Xabi Luberriaga luthierrarengana bisitan joan gara Zugarramurdiko bere etxera eta han bildutakoak entzungo ditugu. Abeslari ezagun askoren gitarrak egiten ditu. Ruper Ordorika, Joseba Irazoki, Joseba Belenoir, Mixel Ducau eta Izarorenak, besteak beste