'Hamalau urteko auzia'

"Gogoan dut Iruña-Veleiako aurkikuntzak aurkeztu zireneko eguna, duela hamalau urte. Emozioz bizi izan nituen hedabideetara ailegatzen ari ziren berriak. Eta ez nintzen bakarra. Hara non, bat-batean, lurrikara batek inarrosi zuen geure buruaz genekiena. Pentsa, mendebaldeko historia eta gure hizkuntzarena berridazten ari ziren Gasteiztik kilometro guti batzuetara. Itxura guztien arabera, Iruña-Veleian zeuden euskararen eta kristautasunaren aztarna zaharrenak. Ez uka ederra zenik. Geroztik, zenbat artikulu, zenbat irratsaio, zenbat liburu, zenbat ika-mika, zenbat eztabaida, zenbat dezepzio". Honelaxe hasi du 'Faktoria' saioko ''Sinadura'' Aingeru Epaltza idazleak.