'Ospitalera gonbidatuko nituzke Gabonetarako neurriak arintzen dituzten horiek'

'Nekatuta, urduri eta aldi berean harrituta' daude, martxotik, COVIDaren aurka borrokan dabiltzan Nafarroako erietxe guneako osasun profesionalak. Gainezka egiteko zorian egon dira, azaro hasieran 100.000 biztanleko 1.000 kutsatuen tasa gainditu du Nafarroak eta orain beherako bidean dira. Baina, egoera ez da ona: '200tik pasa lagun erietxean dago, 40 zainketa berezietako gunean eta astakeria bat da!'. Jon Arizeta, Nafarroako ospitaleko zuzendari-ordearen hitzak dira. Alarma guztiak piztu ditzakeen testigantza utzi du "Faktoria"n: 'uste dut ez garela konturatzen nola blokeatu dezakegu erietxea. Lanetik etxera noanean, kalean dagoena ikusterakoan, konturatzen naiz ez direla konturatzen jasaten ari garenaz. Kolapsatu dezakegu osasun sistema, benetan arriskuan gaude'.

Gabonetarako malgutzea

Espainiako gobernuak Gabonetarako aurreratu dituen neurriez gaidetuta, proposamen batekin erantzun du: 'Nafarroran 800 lagun baino gehiago hil dira COVIDarengatik. Asko ospitale barruan. Nik gonbidatuko nituzke neurriak zabaldu nahi dituzten horiek, erietxera aitortzera. Edo aiton-amonak galdu dituztenekin, hitz egitera'. Iruñeako ospitaleko zuzendari-ordeak gaineratu du, 'nik uste Gabonak ospatu behar direla, baina beste modu batean. Hala egiten ez badugu, errusiar mendi batean sartuko gara eta Gabonak pasa eta berehala' kasu gehiago azalduko dira. Aurreikuspen beltzenak zapuzteko puntuan egon litezke, Jon Arizetaren ustez: 'pentsatzen genuen Gabonak pasa eta 20 bat egunera ospitaleetan arazo askorekin hasiko direla, orain esaten diren neurriekin, agian ez da horrenbeste luzatuko eta Gabonetan ospitaleak gaizki egongo dira. Oso kezkatuta gaude'.