Martxa alda dezagun
Gidabaimena, autonomia eta inklusioa sustatzeko tresna bilakatuta
Aritz Agirre | EITb Mdia
Aniztasun funtzional intelektuala duten pertsonei gidabaimena ateratzen laguntzen die "Martxa alda dezagun" programak, Nafarroako Gobernuko CREENA zentroaren eta Nafarroako Auto Eskolen Elkartearen eskutik. Askorentzat urrats bat gehiago dena, mugarria eta aldarrikapena baita batzuentzat.
Your browser doesn’t support HTML5 audio
Egitasmo honi esker Iratik eta Ainhoak eskura dute gidatzeko baimena lortzea. Ohiko bidetik ezinezkoa zitzaien azterketa teoriko eta praktikoa gainditzea baina orain gai sentitzen dira, autoestima eta konfidantza berreskuratuta. Euren autonomia eta garapenerako funtsezko tresna izan liteke autoa gidatu ahal izatea, eta lan merkatuan sartzeko ateak zabalduko dizkie. Azterketa bera eginen dute, baldintza bertsutan, baina prestaketa berezia eskaini zaie: test kopuru bikoitza, hiru hilabeteko ikastaro trinkoa, eta ikasteko prozedura berritzailea bideo, metodo eta hiztegi berezien laguntzaz. Ainhoa eta Iratiren testigantza biltzeaz gainera, Amaia Carrión Lesaka-Bera autoeskolako irakaslearekin solastu gara "Martxa Alda dezagun" egitasmoaz.
Titularren itzalean ezkutatzen diren arima, historia eta testigantzak ekartzen dizkigu argitara Aritz Agirrek, asteazkenero, Euskadi Irratiko "Faktoria"n.