Aurrestreinaldia
'Handia' filmaren aurrestreinaldia, Euskadi Irratiaren eskutik, ostiralean
EiTB
EiTBren Bilboko egoitzan izango da aurrestreinaldia, 10:30ean, eta bertatik egingo dute goizeko 'Faktoria' saioa, gonbidatu bereziekin.
Ikusmin handia sortu du Handia filmaren estreinaldiak. Asteburu honetan bertan iritsiko da zinema-aretoetara Jon Garaño eta Aitor Arregiren lana, baina, aurretik, Euskadi Irratiak pelikula ikusteko aukera eskainiko die entzuleei ostiral honetan, urriaren 20an, EiTBren Bilboko egoitzan. Emanaldia Multibox aretoan izango da, 10:30ean.
Aurrestrenaldiaren berri emateko, eta bertako giroa bildu eta etxe guztietara helarazteko, 'Faktoria' magazina bertatik egingo du Manu Etxezortuk gidatzen duen taldeak. 10:00etatik 13:00etara, hainbat gonbidatu izango ditu irratsaioak: Jon Garaño eta Aitor Arregi zuzendariak, Eneko Sagardoi eta Joseba Usabiaga aktoreak eta Xabier Berzosa ekoizlea, besteak beste. Gainera, Audience taldearen zuzeneko emanaldiaz gozatzeko aukera izango dute EiTBren egoitzara joaten diren entzuleek.