Gazteak 29 urte beteko ditu ostegun honetan

EiTBko Gaztea irratiak 29 urte beteko ditu ostegun honetan, martxoaren 21ean. 29 urte pasa dira jada Jakeline Barkerrek orduan Euskadi Gaztea izena zuen irratiari ahotsa jarri eta Hertzainak taldearen 'Aitormena' abestia aireratu zuenetik. Urtemugaren harira, hainbat ekimen prestatu du Gazteako lan-taldeak eta, jakina, entzuleekin urtemuga ospatu nahi dute, handikiro.

Alde batetik, 29 urte hauetako kantu arrakastatsuenak berriz entzungo ditugu ostegun eta ostiralean. Orduro, Gazteako esatariek ospakizun honetarako beren beregi berreskuratutako Gaztean Hit izan ziren kantuak berriz entzungo dira programazioan.

Bestetik, Gazteako sareak, 29 urteak ospatzeko, urte hauetan guztietan bildutako argazki eta bideoz beteko dituzte. Gazteako Instagrametik zuzeneko ugari egingo dituzte esatarien gogoetak eta bizipenak kontatzen. Halaber, ostegun zein ostiralean zehar Gazteako estudioan gertatzen diren gauzak erakutsiko dituzte (bisitak, photocalletik ateratzen dituzten argazkiak…) Gazteako estudioa eta harrera, aspaldiko argazkiekin adornatuko dituzte.

Orobat, 29 sari ezkutatuko dituzte tarta erraldoi batean. Ostegunetik ostiralera bitartean 29 sari banatuko dituzte. Goizeko zazpietatik iluntzeko zortziak arte, orduro sari bat emango diote entzule bati. Aste honetan, ostegunera bitartean, entzuleek whatsapp audioen bidez Gaztea zoriondu behar dute. Zenbaki guztiak gordeko dituzte eta ostegunetik aurrera, modu aleatorioan orduro zenbaki bat aterako dute. Esatariak zenbaki horretara deituko du eta entzuleak hartzen duenean, 'Zorionak!' hitza esan eta entzuleak 'Gaztea!' erantzun beharko du. Zuzen egiten badu, zuzenean tarta erraldoian ezkutatuta dagoen sari bat eramateko aukera izango du. 29 kandelekin apaindu dute tarta, bakoitza opari batekin. Entzuleak zenbaki bat esan eta kandela horrek duen saria eramango du etxera. Dena, irrati zein Instagram Live bidez ikusteko aukera izango dute jarraitzaileek. Sarien artean: bost Go Pro, bost akzio kamera, sakelerako telefono bat, dutxan jartzeko bi irrati, eguzkitako betaurrekoak eta sorpresa gehiago izango dira.