Castroko Bandera ere, Arraun Lagunakentzat

Arraun Lagunak da Euskotren Ligako talderik indartsuena, inolako zalantzarik gabe. Hamaika jardunaldi jokatu dira eta hamaika garaipen lortu dituzte. Gaur enegarren erakustaldia eman dute Castroko Bandera (Kantabria) bereganatzeko, eta gainerako aurkariak baino maila bat gorago daudela berretsi dute.

Ohorozko txandan, Andrea Astudilloren ontziak 11 minutu eta 12 segundoko denborarekin irabazi du estropada. Tolosaldea izan da bigarrena (7 segundora), Donostiarra hirugarrena (+12) eta Orio lagunarrena (+22).

Hasieran, lau ontziak parean joan dira, baina itsasoan barneratu ahala, Orio atzean geratu da, eta ziaboga egin ostean, Tolosaldeak soilik eutsi dio Arraun Lagunaki. Bi traineruek parean abiatu dute azken luzea, baina Euskotren Ligako liderraren estualdiak ez du askorik iraun, eta, pixkanaka izan arren, lauzpabost segundoko aldea atera dio Tolosaldeari. Azken txanpan, gainera, abiadura areagotu dute Andrea Astudilloren arraunlariek, eta zazpi segundoko errentarekin gailendu dira helmugan.

Lehen txandan, bestalde, Hondarribia izan da nagusi, atzetik aurrerakoa egin behar izan badu ere. Bigarren posturako, berriz, lehia estua izan dute Cabok eta Hibaikak, baina azken txanpan Errenteriako traineruak hartu dio aurrea Galiziako ontziari. Tiran izan da, beste behin, estropadan azkena.

Gauzak horrela, Arraun Lagunakek sendo eusten dio Euskotren Ligako lidertzari, 88 punturekin, eta Tolosaldea (66), Orio (64) eta Donostiarra (64) daude ondoren, ordena horretan.