Urdaibairen balizko errekorrak eta play-offak izango dira jokoan arraun denboraldiko azken asteburuan

Eusko Label eta Euskotren ligetako play-offak jokatuko dira asteburu honetan Bermeon (larunbata, 18:00) eta Portugaleten (igandea, 12:00) arraun denboraldiari amaiera emateko. Horrez gain, aurten jaun eta jabe izan den Urdaibaik zenbait marka hausteko aukera izango du, liga eta Kontxako Bandera nagusitasun handiz irabazi ostean.

Batetik, Iker Zabalaren mutilak aipatu bi estropadak irabazten ahaleginduko dira, denboraldi honetan 14 garaipen pilatzeko eta, ondorioz, Castrok eta Hondarribiak duten errekorra gainditzeko (13 garaipen lortu zituzten, 2009an eta 2015ean, hurrenez hurren).

Bestalde, denboraldi berean traineru batek inoiz lortu duen puntu marka onena (218 puntu) bermeotarrena da, eta marka hori hobetzen saiatuko dira. Jokoan izango diren 24 puntuetatik 16 lortzea nahikoa izango dute horretarako.

Bermeon nahiz Portugaleten, bina txanda izango dira, eta sailkapeneko lehen zortzi taldeak lehiatuko dira: Urdaibai, Zierbena, Donostiarra, Orio, Hondarribia, Getaria, Lekittarra eta Ondarroa. Cabo da Cruzek eta Kaikurentzat amaitu da denboraldia, bederatzigarren eta hamargarren izan direlako, baita Bueurentzat ere, azkena izan baita.

Horrez gain, play-offak jokatuko dira Bermeoko eta Portugaleteko uretan. Gizonezkoetan, San Pedro mailari eusten ahaleginduko da, eta San Juan, Santurtzi, Ares eta Chapela datorren denboraldian Eusko Label Ligan aritzeko txartelaren bila borrokatuko dira.

Emakumezkoetan, berriz, Cabok Euskotren Ligan duen tokia defendatuko du, Astillero, Zumaia, Chapela eta Rianxoren aurrean.