ESKUBALOIA
Nafarroa izango da emakumezkoen eskubaloiko Superkopa Iberikoaren egoitza, estreinakoz
Txapelketaren hirugarren edizioa irailaren 5ean eta 6an jokatuko da, Anaitasuna pabilioian.
Irudia: Real Federación Española de Balonmano (RFEBM).
Iruñean jokatuko da, lehen aldiz, emakumezkoen eskubaloiko Superkopa Iberikoa. Espainiako Eskubaloi Federazioak (RFEBM) eta Portugalgo Federação de Andebolek (FAP) antolatzen duten txapelketaren hirugarren edizioak Espainiako eta Portugalgo talde nabarmenetako batzuk bilduko ditu irailaren 5ean eta 6an, Anaitasuna pabiloian.
Super Amara Bera Berak, Liga Guerreras Iberdrolako eta Erreginaren Kopako txapeldunak, ostiralean, hilak 5, irekiko du lehiaketa, 18:15ean, Madeira SAD Portugalgo Kopako txapeldunordearen aurka. Ondoren, 20:30ean, Replasa Beti-Onak (Erreginaren Kopako txapeldunordeak) eta SL Benfica (Portugalgo ligako txapeldunak) izango dira aurrez aurre.
Superkopa larunbatean, hilak 6, amaituko da, hirugarren eta laugarren postuak lortzeko partidekin (17:45ean) eta final handiarekin (20:00etan), Anaitasunan kirol-aretoan.