Igandean
Bigarren parte-hartzerik handiena izango du Behobia-Donostiak
Agentziak | Erredakzioa
Ibilbidea aurreko edizioetako bera izango da. Hala ere, aurten, indarberritzeko bi gune jarri dituzte antolatzaileek, jaki solidoekin, ibilbide gogorrari aurre egiteko.
31.000 korrikalari baino gehiago bilduko ditu lasterketak aurten. Argazkia: Efe.
31.276 korrikalarik beteko dituzte igandean Behobia-Donostia lasterketako 20 kilometroak. Iazko parte-hartzearekin alderatuta, 3.000 pertsona gutxiagok eman dute izena. Hala eta guztiz ere, historiako bigarren parte-hartzerik handiena izango da igande honetakoa.
Iaz 33.948 lagunek eman zuten izena, 52 ediziotan izandako kopururik handiena. Emakumezkoen parte-hartzean ere marka guztiak hautsi ziren, 8.000 emakumek egin zuten lasterketa. Aurten, emakumezkoen portzentajea inoiz baino altuagoa da, % 23.
Datu guzti horiek Fortuna San Sebastian klubak, probako antolatzaileak, eman du, lasterketa lehiatzeko lau egun falta direnean.
Behobia-Donostiak aurreko edizioetako ibilbide bera izango du, eta antolatzaileek, korrikalarien lanari laguntzeko, indarberritzeko bi gune berri jarri dituzte, jaki solidoekin.
Horrelako erabakiekin, arriskuak murriztu nahi dituzte, 2015eko edizioan parte-hartzaile bat hil baitzen hego haize beroaren ondorioz.
Faboritoak
Garaipenari begira, azken hiru edizoetako bi garaile Donostian izango dira, 2013 eta 2014koak: Jose Carlos Hernandez eta Pedro Nimo. Emakumezkoetan, Raquel Gomez iazko garailea ere egongo da.
Eguraldiari dagokionez, iganderako haizea, euria eta tenperatura baxuak aurreikusita daude, eta horrek probaren gogortasuna areagotuko du.