NFL
Tom Brady futbol amerikarreko jokalariak erretiroa hartuko duela iragarri du
AGENTZIAK | EITB MEDIA
Buccaneers taldeko quarterbacka bere posizioan inoiz izan den jokalaririk onena izan da, eta, 22 denboraldiren ostean, agur esango dio NFL txapelketan jokatzeari.
Tom Brady pase bat emateko zorian. Argazkia: EFE
Tom Brady futbol amerikarreko Buccaneers taldeko quarterback (pase-emaile) ezagunak astearte honetan iragarri du ofizialki NFL (National Football League) txapelketan jokatzeari utziko diola, bertan 22 denboraldi eman eta Super Bowleko 7 eraztun irabazi ondoren.
"Hausnarketan aritu naiz, eta galdera zailak egin dizkiot neure buruari. Uste dut zaleek nire ehuneko ehuna merezi dutela, baina une honetan hobe da joko-zelaia jokalari konprometituen hurrengo belaunaldiari uztea", idatzi du Bradyk agur gisa sare sozialetan.
Bradyk 44 urte ditu, eta 1977ko abuztuaren 3an jaio zen, San Mateon (Kalifornia). 2000. urtean, New England Patriots taldeak fitxatu zuen, eta Massachusetts estatuko talde horretan 20 denboraldi jokatu eta 6 Super Bowl irabazi zituen.
2020an, kaliforniarrak agur esan zion Patriots taldeari, eta Tampa Bay Buccaneers Florida hegoaldeko taldearekin sinatu zuen kontratua. Bertan eman zuen lehen urtean, bere taldea Super Bowleko finalera sailkatu zuen, eta bere 7. eraztuna eta frankiziaren historiako bigarrena eskuratu zituen.
Horrela, NFLren historian bi talde ezberdinekin txapeldunaren eraztuna irabazi duen bigarren quarterbacka bihurtu zen, Payton Manning (Indianapolis Colts eta Denver Broncos) ospetsuak lortu baitzuen aurretik.
NFL liga 7 aldiz irabazteaz gain, Super Bowl gehien (10) eta konferentziako final gehien (14, horietatik 8 jarraian) jokatu dituen jokalaria da Tom Brady.
Horrez gain, NFLko errekor nagusiak ditu quarterback posizioan: besteak beste, beste inork baino yarda gehiago lortu ditu bere paseekin (96.969), touchdown bihurtutako pase gehien eman dituen jokalaria da (707), pilatutako garaipen gehien dituena (277) eta play-offetan partida gehien jokatu dituena (45).