Europako Jokoak
Teresa Fernandez-Mirandak txirrindularitzako BMX Freestyleko finalerako txartela lortu du Europako Jokoetan
EITB Media
Donostiarra zazpigarren izan da lehen proban, eta finalerako sailkatu da. Nerea Garcia, berriz, finaletik at geratu da, piraguismoko K4-500 proban, finalerdietan laugarren izan ostean.
Teresa Fernandez-Miranda. Argazkia: @COE_es
Abian dira Europako Jokoak Polonian. Asteazken honetan, ekainaren 21ean, inaugurazio ekitaldia egin da arratsaldean, Krakoviako Henryk Reyman estadioan, baina goizean hasita ibili dira lehian kirolariak.
Euskal kirolari batzuek lehen probak jokatu dituzte goizean. Txirrindularitzako BMX Freestyle modalitatean, esaterako, Teresa Fernandez-Mirandak finalerako txartela lortu du. Zazpigarren izan da lehen proban, eta finala jokatuko du ekainaren 22an.
Bestalde, piraguismoko K4-500 modalitatean, Nerea Garciak lehen kanporaketa gainditu du hiru taldekideekin batera, baina ez dute finalerako sailkapena lortu. Ezbeharra izan dute finalerdietan, oinen euskarria hautsi baitzaie, eta laugarren amaitu dute. Lehen hirurak soilik sailkatu dira finalerako, eta, ondorioz, kanporatuta geratu dira.