Eskubaloia
Bidasoak Ystads menderatu du (35-32), eta bi puntu gehiago batu ditu EHF Europako Ligako hurrengo faserako
EITB MEDIA
Ikusgarria izan den partidan, Alex Mozasen gizonek bigarrenez menderatu dute Ystads, alegia, D multzoan "main round" izeneko faserako sailkatzea lortu duen beste taldea; hala, euskal taldeak lau puntu dituela ekingo dio hurrengo multzo fase horri.
Asier Nieto, salto ikusgarria egin duen jokaldi batean. Argazkia: EITB Media.
Bidasoa Irunek garaipena lortu du Ystads IF HF taldearen aurka, 35-32, 2024-25 denboraldiko EHF Europako Ligako multzo faseko seigarren eta azken jardunaldian, Artalekun, D multzoan, astearte gauean. Horrenbestez, Alex Mozasen taldeak bi aldiz hartu du mendean Ystads, alegia, D multzoan Bidasoarekin batera EHF Europako Ligako hurrengo faserako sailkatu den taldea; horren ondorioz, "main round" izeneko fasean, euskal taldeak lau puntu dituela ekingo dio txanda horri. "Main round" fasean, Bidasoa Ystadsekin, Benficarekin eta Limogesekin batera arituko da multzoan; Portugalgo eta Frantziako taldeek bina puntu izango dituzte fase horretako hasieran, eta Ystadsek, ordea, ezin izan du punturik batu.
Hala, asteartean jokatutako neurketan, Bidasoak, lehen zatian, bost goleko aldea ere izan du, 14-9koan, baina Ystadsek asmatu du gehiago lehen zati horretako azken txanpan, eta, azken minutuetan Suediako taldeak 3-7ko partziala lortuta, atsedenaldian euskal taldea zebilen aurretik, baina gol bakarreko aldea zuten Alex Mozasen gizonek (17-16). Gorka Nietok eta Asier Nietok launa gol sartu dituzte, partidako aurreneko hogeita hamar minutuetan.
Bigarren zatian emozio handia izan da. Ystadsek ondo jokatu du, eta Bidasoak, hortaz, bere onena eman behar izan du garaipena eskuratzeko; Artalekuko zaleek biziki eskertu dute hori, partida ederraz gozatzeko aukera izan baitute. Alex Mozasen taldearen aurkaria hainbat aldiz izan da aurretik markagailuan, bigarren zati horretan, baina euskal taldeak, bizi-bizi jokatuz eta zenbait jokaldi ikusgarri eginez, bi puntuak erdietsi ditu, azkenean. Beraz, Bidasoak ezin hobeto ekingo dio EHF Europako Ligako "main round" faseari; hori otsailaren 11n hasiko da.
Bidasoako jokalariek poz handiz ospatu dute garaipena. Argazkia: EITB Media.
Fitxa teknikoa
35 – Bidasoa Irun: Skrzyniarz, Leo Maciel; Cavero (2), Esteban Salinas (6), Rodrigo Salinas (5), Furundarena, Dariel Garcia (5), Boskos, Gorka Nieto (5), Zabala, Jevtic, Gey-Emparan, Mujika (2), Asier Nieto (8), Pedro Pacheco (2), Asier Iribar.
32 - Ystads IF HF: Linden, Hvenfelt; Ekberg (6), Fernebrand (2), Joelsson (4), Landin (1), Martensson, Nygren (1), Olsen (5), Persson, Stenmalm (1), Lindskog Andersson (4, 2 penaltiz), Hutberg (1), Mansson (4), Wilthorn (3), Tonnesen.
Epaileak: Ismail Metalari eta Nenad Nikolovsdi (Ipar Mazedonia).
Gertakizunak: 1.400 bat zale, Artalekun.