Alavesek berdindu egin du Leganesen aurka (1-1)

Alavesek bana berdindu du Los Angeles de San Rafaelen egiten ari den egonaldiaren barruan Leganesen aurka lehiatutako lagunartekoan (1-1). Beroa izan da partidako protagonista nagusietakoa.

Madrildarrek erritmo gehiago erakutsi dute lehen zatian, eta horren adierazle izan da aurretik jarri direla markagailuan 25. minutuan. Guido Carrillo argentinarrak egin du gola Mauricio Pellegrino arabarren entrenatzaile ohiak zuzentzen duen taldearentzat, El Zharren pasea aprobetxatuta.

Lehen golaren ostean, Leganesek beste aukera garbi bat izan du jarraian (27. minutuan), baina Dani Ojedaren jaurtiketak langan jo du.

Bigarren zatian, berriz, Alavesen jokoak hobera egin du, eta aldaketen bidez neurketaren jabe egin da berdinketa lortu duen arte. Paulino de la Fuente harrobiko jokalaria izan da golegilea kontra-eraso batean.

Gol horren ondoren, gasteiztarrek ekinean jarraitu dute, eta euren aurkaria baino gehiago izan dira; dena den, norgehiagoka banako berdinketarekin amaitu da.

Fitxa teknikoa:

Alaves 1: Sivera; Martin, Ely, Maripan, Ximo; Wakaso, Manu Garcia; Ibai, Burgui, Hector; eta Baston.

Leganes 1: Serantes; Juanfran, Muñoz, Siovas, Raul Garcia; Gumbau, El Zhar, Dani Ojeda, Ruben Perez, Facundo; eta Carrillo

Golak: 0-1, 25. min: Carrillo. 1-1, 70. min: Paulino.