Alavesek Vila-realen zalantzak baliatu nahi ditu

Alavesek Vila-real izango du aurkari larunbat honetan (16:15). Gasteiztarrek mailari eusteko beharrezkoa den puntu kopurua ahalik eta azkarren lortu nahi dute, asmo handiagoei begira jartzeko. Izan ere, seigarrenak dira sailkapenean, 37 punturekin, eta datorren urtean Europan izateko eskubidea ematen duten borrokan daude murgilduta une honetan.

Takashi Inuik bere lekua aurkitu du Abelardoren eskeman, eta arabarrek nabaritu egin dute jokalari japoniarraren ekarpena. Inuik, Jony Rodriguezek eta Jonathan Callerik hirukote erasokorra osatzen dute entrenatzaile asturiarrak erabili ohi duen 4-3-3ko sisteman.

Bestalde, Diego Rolan eta Alex Blanco deialditik kanpo geratu dira; aitzitik, barruan dira John Guidetti, Burgui eta Rodrigo Ely. Azken hori duela gutxi sendatu da denbora luzean lesionatuta egon ostean.

Abelardok, bestalde, ezingo du zigortuta dagoen Ximo Navarro erabili, ezta min hartuta jarraitzen duen Martin Agirregabiria ere. Hori dela eta, seguruena Carlos Vigaray arituko da eskuineko hegalean.

Azkenik, nahiz eta Tomas Pinak ez duen astean zehar behar bezala entrenatu, entrenatzaileak Vila-realera bidaiatuko duten jokalarien artean sartu du, eta bere talde ohiaren aurka jokatzeko gertu egongo da Ciudad Realeko erdilaria.

Bere aldetik, Vila-realek etxeko partidetan akatsik ia ezin eginda ekingo dio denboraldiko fase erabakigarriari, mailari eustea lortu nahi baldin badu.

Talde horia Atletico Madrilen etxean galtzetik iritsiko da norgehiagoka honetara; dena dela, Javi Callejak taldearen ardura denboraldian bigarrenez hartu zuenetik bost neurketa zeramatzan galdu gabe.

Vila-realen aspaldidanik lesionatuta daude Bruno Soriano, Daniele Bonera eta Manu Trigueros, eta, horiez gain, Alavesi aurre egiteko zalantzan daude Santi Caseres eta Javi Fuego.

Balizko hamaikakoak:

Vila-real: Asenjo, Mario, Alvaro, Funes Mori, Víctor Ruiz, Pedraza; Iborra, Manu Morlanes edo Fornals, Cazorla, Bacca eta Toko Ekambi edo Gerard Moreno.

Alaves: Pacheco, Vigaray, Laguardia, Maripan, Duarte, Darko, Wakaso, Manu Garcia, Inui, Calleri eta Jony.

Epailea: Jose Luis Munuera Montero.

Futbol-zelaia: Zeramikaren estadioa.

Ordua: 16:15.