LARUNBATEAN, 13:00ETAN
Alavesek irabazi egin nahi dio berriro Real Madrili Mendizorrotzan
AGENTZIAK | ERREDAKZIOA
Talde zuriaren aurka joan zen denboraldian lortutako garaipena oraindik fresko dutela, babazorroek sentsazio berak bizi nahi dituzte berriz.
Your browser doesn’t support HTML5 video
Alavesek Real Madril hartuko du larunbat honetan Mendizorrotzan (13:00), Santander Ligako 15. jardunaldian.
Madrildarrek hamar urte zeramatzaten Gasteizen galdu gabe, azken Ligetan lau garaipen jarraian lortuta; alabaina, joan zen denboraldian galtzea egokitu zitzaien Manu Garciak luzapenean sartutako gola dela medio (1-0).
Hartara, arabarrek garaipena errepikatu nahi dute euren zelaian azaldu ohi duten sendotasuna aprobetxatuz, non apenas jasotzen dituzten golik.
Gasteiztarrek une gozoan egingo diote aurre partidari, etxetik kanpo denboraldiko lehen neurketa bereganatzetik baitatoz Eibarren aurka (0-2), eta, horrek bi garaipen jarraian lotzea ekarri zien.
Asier Garitano entrenatzaileak Victor Laguardia eta Manu Garcia jokatzeko moduan izango ditu, aurreko jardunaldian zigortuta egon ostean, txartelak pilatzeagatik.
Bestalde, Real Madrilek bere jokoan izandako hobekuntza berrestea espero du Gasteizen, eta, bide batez, behin-behinean Bartzelonaren aurrea hartzea sailkapenean.
Zinedine Zidanek ezustekoa eman zuen asteartean, PSGren aurkako Txapeldunen Ligako neurketan, Isco Alarcon hamaikakoan sartzearekin, lau erdilari eta erasoko bi jokalari besterik ez zelairatuta. Apustua ondo atera zitzaion entrenatzaile frantziarrari, jokoaren nagusitasunari dagokionez, baina orain ikusteke dago etxetik kanpo ere era berean jokatuko duen, etxean bi gol besterik jaso ez dituen aurkari baten kontra.
Zidanek ez du Eden Hazard jokatzeko moduan izango. Belgikarra gorantz ari zen, eta Madrilek onerako nabaritu du, baina bihurritua izan zuen orkatilan Txapeldunen Ligan eta ez da deialdian sartu.
Egoera horrek Gareth Baleren jokatzeko aukerak areagotu ditu, Bernabeuko zaleen txistu-soinuetatik urruti.
Balizko hamaikakoak:
Alaves: Pacheco, Aguirregabiria, Ely, Laguardia, Duarte, Tomas Pina, Wakaso, Manu Garcia edo Joselu, Vidal, Burke eta Lucas Perez.
Real Madril: Courtois, Carvajal, Militao, Sergio Ramos, Marcelo, Casemiro, Kroos, Modric edo Valverde, Bale, Vinicius edo Rodrygo eta Benzema.
Epailea: Guillermo Cuadra Fernandez.
Futbol-zelaia: Mendizorrotza.
Ordua: 13:00.