Ohar ofiziala
Alavesek hiru koronabirus kasu atzeman ditu PCR proben bidez
AGENTZIAK | ERREDAKZIOA
Kutsatuak "sintomarik gabe, etxean isolatuta eta osasun egoera onean" daudela azpimarratu du Gasteizko taldeak.
Alavesek COVID-19 gaitza duten hiru pertsonaren berri eman du. Argazkia: @Alaves
Alavesek astearte honetan jakinarazi duenez, hiru koronabirus kasu atzeman ditu lehen taldeko kideei astelehenean egin zizkien PCR probei esker.
"Kutsatuak sintomarik gabe, etxean isolatuta eta osasun egoera onean daude", azpimarratu du Gasteizko klubak plazaratu duen prentsa-oharrean.
Bertan gaineratu duenez, osasun agintariak eta LaLiga jakinaren gainean daude, eta protokoloetan ezarritako neurri guztiak bete dituztela nabarmendu du.
Hala, probak "segurtasun-neurri zorrotzak" jarraituz egin zirela eta klubeko gainerako langileekin kontakturik egon ez zela azaldu du Alavesek. Horrez gain, futbolariak bakoitza bere ibilgailuan, hiru minutuko tartearekin eta elkarrekin inolako harremanik izan gabe egin zituztela zehaztu du.
Datozen egunetan, PCR proba egingo diete berriro positibo eman dutenei, taldekideekin batera lanean noiz hasi ahal diren erabakitzeko.