Aurkari zuzenei begira
Jardunaldi erabakigarria Alavesentzat salbaziorako aukerei eusteko
EITB Media
Arabako taldeak Espanyolen aurka jokatuko du asteazkenean Mendizorrotzan. Garaipena behar du mailari eusteko aukerekin jarraitzeko; hala ere, Granadak eta Cadizek euren partidak irabazten badituzte, Alavesek maila galduko du.
Santander Ligako lehen itzuliko Espanyol - Alaves partidako irudia. Argazkia: Argazkia: EFE
Alavesek mailari eusteko dituen aukerak agortu nahi ditu asteazken honetan (maiatzak 11) Espanyolen aurka Mendizorrotzan jokatuko duen Santander Ligako 36. jardunaldiko partidan.
Kataluniako taldearen aurka porrota jasotzeak Alaves Bigarren Mailara jaistea bermatuko luke. Gasteizko taldea salbaziotik sei puntura dago, eta jaitsiera postuetatik at dagoen lehen taldearekin, Granadarekin (34 puntu), galduta du "averagea".
Granadak Athleticen aurka jokatuko du asteartean Carmenes estadioan. Andaluziako taldeak garaipena lortu eta Cadizek Realari irabaziz gero, Alavesek agur esango lioke Santander Ligari, Espanyolen aurka garaipena lortuta ere, salbaziotik zazpi puntura geratuko litzatekeelako, eta azken bi jardunaldietan jokoan sei puntu besterik ez liratekeelako egongo.
Ondorioz, Granadak eta Cadizek lortzen dituzten emaitzak hobetzea behar du Alavesek mailari eusteko aukerak izaten jarraitzeko. Cadizek ostegunean jokatuko du Realaren aurka, Reale Arenan.