EA Sports Liga
Alavesek ezin izan dio aurre egin lidergoa berreskuratu duen Gironari
EITB MEDIA
Babazorroek ezin izan dute Gironakoen erasoaldia gelditu, eta 3-0 galdu dute partida. Gironak EA Sports Ligako lehenengo postua lortu du berriro ere, Real Madrilekiko bi puntuko abantailarekin.
Gironako aurrelari Artem Dovbyk-ek gol bat sartzen. Argazkia: EFE
Alavesek 0-3 galdu du Gironaren aurka astelehen honetan Montilivin jokatu den EA Sports Ligako 17. jardunaldian. Horrela, talde katalanak sailkapeneko lidergoa berreskuratu du, Real Madrili bi puntuko aldea aterata.
Miguel Angel Sanchezen taldeak hasiera-hasieratik nahi izan du partida mendean hartu. Anbizio handikoa izan da, eta lehenengo minutuetan markagailu irekitzen saiatu da Artem Dovbyk-en burukada batekin, baina Rafa Marinen sorbaldan jo du baloiak. Ondoren, babazorroek kontraerasoari ekin diote, eta Samu Omorodionen abiaduran jarri dute konfiantza osoa, horrek izan baititu gasteiztarren artean aukerarik onenak markagailuan aurrera egiteko.
Mehatxu hori gorabehera, Gironak ez du etsi eta kontagailua ahalik eta lasterren irekitzea bilatu du, eta horixe egin du Dovbykek 23. minutuan. Tanto horri esker, katalanak sendotu dira, eta Omorodionen burukada batekin susto txiki bat izan duten arren, atsedenaldiaren atarirako garaipenera lerratu dira 2-0ekoarekin, Porturen golari esker.
Alavesekoak aurrera egiten saiatu dira atsedenaldiaren ostean, aldeak ahalik eta azkarren murrizten saiatuz. Rafa Marin, zutoinetik gertu joan den burukada batekin, eta Luis Rioja, areaz kanpotik egindako jaurtiketa batekin, lortzeko zorian egon dira, baina pixkanaka Girona berregin egin da eta erabakita utzi du norgehiagoka. Izan ere, Yan Coutok gasteiztarren arean egindako ekintza berri batek penaltian amaitu du, eta Dobvyk izan da baloia sarearen barruan sartzearen ardura izan duena; horri esker, dagoeneko hamar gol sartu ditu Ligan.
Partida erabakita zegoela, Michel ahaleginak banatzen hasi da eta partida bi aldeetara zabaldu da, baina etxekoek ezin izan dute markagailua handitu, nahiz eta Pablo Torrek eta Valeryk aukera onak izan dituzten, ezta gasteiztarrek ere, Ruben Duartek langa jo baitu.
Fitxa teknikoa:
3 - Girona: Gazzaniga; Èric, David Lopez (Juanpe, 79. min), Blind; Yan Couto (Arnau, 79. min), Ivan Martin (Jhon Solis, 73. min), Aleix Garcia, Miguel; Portu (Pablo Torre, 64. min), Savio (Valery, 64. min); y Dovbyk.
0 - Alaves: Sivera; Nahuel Tenaglia, Rafa Marín, Ruben Duarte, Javi Lopez; Guevara, Blanco (Carlos Benavidez, 78. min); Gorosabel (Alex Sola, 73. min), Guridi (Hagi, 61. min), Luis Rioja (Abde Rebbach, 61. min); y Samu Omorodion (Kike Garcia, 73. min).
Golak: 1-0, 23. min: Dovbyk. 2-0, 42. min: Portu. 3-0, 59. min: Dovbyk, penaltiz.
Epailea: Hernandez Maeso (Extremadurako Batzordea. Nahuel Tenaglia zigortu du (39. min).